Umdlalo wangeSonto phakathi kweZimbabwe Warriors le Namibia ngowokudinga amaqembu azangena kumncintiswano owe Africa Nations Championship njalo udlalelwa enkundleni eyeNational Sports Stadium eyeHarare.
Ukhaphutheni weqembu uOcean Mushure ukhanya engasoze edlale ngoba elimele. Kuthi uTalent Chawapihwa ukhanya laye engasoze enelisa ukudlala emdlalweni lo njengoba esesukumile elubhekise kwele South Africa ukuyaqala ukudlalela iqembu lakhe elitsha le Baroka elikusigaba saphezulu kulelozwe ese South African Absa Premiership.
Omunye njalo umdlali uGerald Takwara laye lokhe engakasili umkhuhlaneni omehlele emdlalweni wehlandla lakuqala phakathi kwamaqembu womabili odlalelwe eWiendhoek lapho amaWarriors adliwe 1-0.
Kodwa-ke loba kunjalo umqondisi wamaWarriors uWellington Mpandare uqinisa abalandeli baleli qembu ngokuthi ule themba lokuthi abazathatha izikhundla zalabo abangekho uHonest Moyo owe Highlanders, uDenver Mukamba owe Dynamos, uDevon Chafa owe Caps United lo Leeroy Mavhunga oweYadah bazadlala kakuhle.
Ama Warriors avele elabagadli abathembakeleyo abanjengo Abbas Amidu owe Caps United, uEmmanuel Mandiranga owe Dynamos lowe Highlanders uPrince Dube lapho bedlalela ukunqoba emdlalwen wangeSonto.
Leli qembu kumele linqobe ngemiklomelo embili nxa lifuna ukuvimba eleNamibia ukuqhubekela phambili lilokhu likulumcintiswano, ukuze lidlale lele Lesotho lele Comoros, loba ele Comoros linqobe ele Lesotho 2-0 ngempelaviki edluleyo.
Ngasikhathi sinye iqembu elimela ele Zimbabwe emdlalweni owe rugby elama Sables lilubhekise enkundleni eye Hatsfield Grounds ngoqmgibelo ukuyadlala lele Kenya ngemva kokunoqtshwa yi Namibia 31-26 ngempelasonto edluleyo emcintisweni owe Africa Gold Cup Group 1A.
