amalinks wokungena

Breaking News

Iqembu LamaWarriors lilakho Ukuyadlala Emncintisweni weAfcon Ngomnyak'ozayo


Zimbabwe Warriors
Abalandeli beqembu elimela ilizwe emdlalweni wenguqu elama Warriors bathi leliqembu lilakho ukufinyelela ukuyadlala emncintisweni we Afcon ozaqhutshelwa kwele Morroco ngomnyaka ozayo nxa kukhangelwa uhlelo lwemidlalo elimele liyidlale emkhankasweni walo.

Iqembu lama Warriors lizadibana lele Tanzania esigabeni sakuqala sokudinga amaqembu azaphatheka emkhankasweni wokuyadlala emncintisweni we Africa Cup of Nations kuthi lingaphumelela lapho lizadlala lelizanqoba phakathi kwe South Sudan Kanye le Mozambique esigabeni sesibili.

Ngemva kwalokho ama Warriors azabe ezathola ilungelo lokuncintisa emidlalweni yezibaya likusibaya sika Group F ndawonye le Zambia, iCape Verde Kanye le Niger.

Uhlelo lolu luchazwe njengohambo oluhambeka lula ngababhala lokusakaza ngomdlalo wenguqu okuyinto evunywe ngolandela umdlalo kanobhutshuzwayo uSibonakaliso Ndlovu.

IZimbabwe le Tanzania zizadlala umdlalo wazo wakuqala ngempelaviki eyamhla zilitshumi lesithupha kunyanga kaNkwenkwezi kuthi ihlandla lesibili lomdlalo libe khona ngemva kwamaviki amabili.
Imidlalo yesigaba sesibili izadlalwa phakathi laphakathi kwenyanga kaNtulikazi.

Sikhangele umdlalo wokugijima:

Abadlali abaphatheke kumncintiswano we ZITF Coca-Cola Four Minute Mile behluleke ukugijima lumncintiswano ngaphansi kwemizuzu emine ngoMgqibelo endaweni ye Showground koBulawayo.

Onqobe kulumncintiswano ngumdlali ogijimela iBlanket Mine uWellington Varevi yena oqede ngemva kwemizuzu emine lemzumzwana elitshumi lesikhombisa kuthi ngemva kwakhe kube lo Wirimai Juwawo oqede ngemva kwemizuzu emine lemizuzwana elitshumi lathoba minwe mbili.

Kundawo yesithathu kube lo Isaac Mpofu oweqembu le ZRP Fairbridge.
Sekuleminyaka efika phose amatshumi amabili selokhu kwaba lomdlali owenelise ukugijima lumango ngaphansi kwemizuzu emine njalo lo ngu Edgar Mavhera owayegijimela iqembu le Bulawayo Bottlers ngomnyaka ka 1995.
XS
SM
MD
LG