Iqembu elimela ilizwe le Zimbabwe kumncintiswano wokudinga intshantshu zezwekazi lase Africa, ele FC Platinum, kuzamele libophe ziqine ukuze lenelise ukudlulela kusigaba esilandelayo esomncintiswano weTotal CAF African Champions League ngemva kokunqotshwa elikwenziwe kuhlandla lakuqala ele preliminary round ngeSonto kwele Angola.
Abafana be FC Platinum bahlangane lembila zithutha kwele Angola lapho abatshaywe khona nge 3 ka nya liqembu le Clube Desportivo Premeiro de Agosto njalo limpumela itsho ukuba kumele lihlohle kane kungela mpendulo ukuze lidlulele kusigaba sakuqala esomncintiswano.
Okunye elingakwenza iqembu le FC Platinum yikuba lihlohle kathathu kungela mpendulo ukuze kutshaywe imbekwa njengoba kuyabe sekungutshiki lobhanqa 3 ka 3.
Umdlalo wehlandla lesibili uzaqhutshelwa enkundleni yeMandava edolobheni le Zvishavane ngempelaviki ezayo njalo iqembu eliyadlulela kusigaba se first round lizadibana lelizanqoba phakathi kweqembu le Bidvest Wits elase South Africa lele Pamplemousse ele Mauritius.
Iqembu le Bidvest Wits lizifake esimeni esihle esokudlulela phambili njengoba linqobe nge 2 ka nya lidlala lingekhaya ngoMgqibelo.
Kolunye udaba olumayelana lomdlalo wenguqu kucacile ukuba iqembu le Highlanders liyamdinga ngempela umgadli obukhali ngemva kokuba lingqikilane leqembu le Nichrut okuliqembu elitsha kusigaba se Premier Soccer League ngeSonto enkundleni yeLuveve umdlalo waphela zingutshiki lobhanqa kungela qembu elenelise ukulitshayela emambuleni loba nje abafana beBosso bebekhulela elezivakatshi.
Umsekeli kamqeqetshi weqembu le Highlanders uMandla Mpofu uthi kabalali bedinga umgadli ongabahlohlela.
“Njengomdlalo wethu wakuqala owe pre – season ngilethemba ukuba abalandeli bethu basuke belethemba elokuba ikusasa yeqembu inhle njalo abafana batshengisele ukuba ibhola bayadlala okokuthi ngabe bekulomuntu obeqedisa aluba amabili kumbe amathathu angenile.
“Asilali ngendaba yokuthola umuntu ozabe eqedisa phambili, umdlali olesikhathi eside edlala ibhola ngoba abafana esilabo ngabancane abagijimayo njalo yena owakhe umlandu kuyabe kungowokulindela ukuba abafana benze umsebenzi yena aqedise.”
Iqembu le Highlanders lakhiwa kutsha ngumqeqetshi uMadinda Ndlovu kanye labanye bakhe ababalisa uMpofu, uMelusi Sibanda kanye lo Tembo Chuma njalo inengi labadlali balo ngabafana abasakhulayo abalamadlabuzane njalo ngeSonto bakholisise kakhulu abalandeli beqembu ngokupasana abakade bekwenza ibhola kodwa obekubehlula yikuba belitshayele emambuleni.
