amalinks wokungena

Breaking News

Iqembu leBosso Likhulumisana loMark Harrison Ukuthi Abengumqeqetshi Walo Omutsha


Kenneth Mhlophe umgcinisihlalo weHighlanders

Iqembu lenguqu ele Highlanders libikwa seliqhatshe umqeqetshi oyisizalwane sakwele Bhilithani, uMark Harrison njengomqeqetshi walo omutsha ngemva kokwehlukana loPieter De Jongh oyisizalwane sakweleNetherlands.

Ukuqhatshwa kukaHarrison kwenziwa ngemva kokuba obengumqeqetshi walo uHendrikus Pieter de Jongh, ethe yena usedlulela phambili ngemva kokusebenzela leliqembu okwenyanga ezine.

Umgcinisihlalo weqembu le Highlanders uKenneth Mhlophe utshele abephephandaba le Chronicle ukuba sebexoxisane lo Harrison njalo sekusele ukuba lumqeqetshi alobelane labo isivumelwano semsebenzi.

Sixoxisane labalandeli beqembu le Highlanders ukuze sizwe imibono yabo phezu komqeqetshi omutsha njalo inengi labo likhanya livumelana lesinqumo esokuba kuqhatshwe umqeqetshi ovela phandle.

UThabani Sibanda uthi liyabe lenze kuhle iqembu le Highlanders nxa lingadinga umqeqetshi ovela phetsheya kolwandle ngoba bona belolwazi olungcono kulabaqeqetshi bakuleli.

“Abaqeqetshi base Europe bayawazi umsebenzi wabo ngoba sebenanzelela ukuba umdlalo wenguqu sewudinga ubungcintshi be science njalo khonokho kubenza babe ngcono kakhulu kulabaqeqetshi bakwele Zimbabwe,” kutsho uSibanda.

UStanley Mpofu uthi iqembu le Bosso lilakho ukuqhubekela phambili lidlala kuhle loba sekubuye umqeqetshi omutsha ngoba lilokhu lilabadlali abanengi abakade belidlalela nyakenye.

“Iqembu le Highlanders lilakho ukuyala lilokhu lidlala kuhle ngoba umqeqetshi lowu omutsha uzathola inengi labadlali be Highlanders abakade bevele bedlala nyakenye belokhu bekhona.

Ngalokho ke iqembu leli lingayala lilokhu liwatshaya amanye amathimu ngoba kuyabe kungela nguquko enkulu kubadlali kodwa kuyabe kuntshintshe umqeqetshi kuphela,” kutsho uMpofu.

Inengi labadlali beqembu le Highlanders balokhu belezivumelwano zomsebenzi leqembu leli njalo kabadluli abahlanu abadlali abalezivumelwano zomsebenzi esezifike emaphathelweni.

UNoma Mguni uthi yena inkinga ngabaqeqetshi abasuka phetsheya kolwandle yikuba bahola imali enengi kakhulu njalo abayiphiwa ingamadola aseMelika.

“Abaqeqetshi baphandle baphiwa imali enengi njalo bayiphiwa iyimali yakwamanye amazwe. Nxa ukhangela isimo sezimali kuqembu le Highlanders uzananzelela ukuba kulengozi eyokuba iqembu lingasala lisezikweledeni.

Ngalokho ke mina bengikubona kungcono ukuba leliqembu ngabe liphe ithuba abaqeqetshi bakuleli,” kutsho uMguni.

Umqeqetshi otshiye umsebenzi uHendrikus Pieter de Jongh uqhatshwe liqembu le Highlanders ngemva kokuba uMadinda Ndlovu etshiye umsebenzi wabuyela kwele Botswana watshiya iqembu liqeqetshwa ngu Mandla Mpofu.

Bekungasikho kwakuqala ukuba iqembu le Bosso liqeqetshwe ngumqeqetshi ovela phetsheya kolwandle njengoba eminyakeni eyedluleyo like laqhatsha abaqeqetshi ababalisa uEddie May kanye lo Bobby Clark bona abathuthukise kakhulu indlela leliqembu ebelidlala ngayo.

UHarrison uke wasebenza njalo emazweni abalisa ele South Africa kanye lase Botswana.

Ezemidlalo siloJoseph Njanji
please wait

No media source currently available

0:00 0:02:45 0:00

Facebook Forum

XS
SM
MD
LG