Sebephange bazitholela isipho seKhisimusi abalandeli beqembu lomdlalo wenguqu ele FC Platinum lona eli phakamise inkezo ye Chibuku Super Cup ngemva kokunqoba elikwenze ele Ngezi Platinum Stars.
Ngokwesibili ukuba iqembu le FC Platinum liphakamise inkezo ye Chibuku Super Cup selokhu lumncintiswano wavuselelwa ngomnyaka ka 2014 njalo umqeqetshi walo uNorman Mapeza ubonge kakhulu abalandeli baleliqembu ngosekelo lwabo.
“Kubalandeli bethu ngithi, ngihlala ngisitsho ukuba bayinsika yethu selokhu ngafika kuleliqembu. Sesiyimuli eyodwa njalo isicoco lesi yisipho sabo seKhisimusi,” kutsho uMapeza.
Bekungokwesithathu ukuba zombili i FC Platinum le Ngezi Platinum Stars zifinyelele ku final eyenkezo ye Chibuku Super Cup njalo ele Ngezi yilo eliphakamise inkezo ngo 2016 ikanti nyakenye linqotshwe ngele Highlanders nge 1 ka nya.
Iqembu le FC Platinum lithole inkulungwane ezingamatshumi ayisikhombisa lanhlanu zamadola aseMelika ngokunqoba elikwenze kumncintiswano walonyaka owe Chibuku Super Cup kusithi ele Ngezi Platinum Stars lona lithole inkulungwane ezingamatshumi amahlanu.
Amaqembu aphelele kusigaba se semi – final ele Cranborne Bullets kanye lele Dynamos wona athole inkulungwane ezingamatshumi amabili lanhlanu kusithi lawo aphelele kusigaba se quarter – final athole inkulungwane ezilitshumi lanhlanu.
Amaqembu alitshumi aphelele kusigaba sezibaya wona athole inkulungwane eziyisikhombisa.
Umdlali weqembu le FC Platinum uBrian Banda nguye okhethwe ukuba nguye odlale okwedlula abanye ku final njalo uthi bazabopha ziqine ukuze lakumidlalo yeligi kube yibo abaphakamisa isicoco.
“Esizakwenza yikuba sizasebenza kanzima njengalokhu esikwenze kulumncintiswano okudale ukuba siyiphakamise inkezo ye Chibuku,” kutsho uBanda.
Iqembu le FC Platinum yilo elicine ukuphakamisa isicoco seligi ngomnyaka ka 2019 njalo beselileminyaka emithathu ilandelana lilokhu lisiphakamisa okutsho ukuba yilo ebelimela ilizwe kumncintiswano we CAF Champions League.
Ukunqoba kunkezo ye Chibuku kutsho ukuba iqembu le FC Platinum selithole ilungelo elokuyamela ilizwe le Zimbabwe kumncintiswano we CAF Confederations Cup.
Imidlalo yeligi iqhubekela phambili ngoLwesithathu lapho eyabe ingena khona kuviki yesithathu njalo kulomdlalo owodwa ozadlalwa phakathi kwele Harare City lele Yadah.
Eminye imidlalo yeviki lesithathu eye Premier Soccer League izadlalwa ngoMgqibelo kuthi eminye izakuba khona ngeSonto.
