amalinks wokungena

Breaking News

Iqembu leTalen Vision Lilokhu Likhokhela Emidlalweni yeSouthern Region Division One Soccer League.


Iqembu le Talen Vision selilemiklomelo engamatshumi amane lathoba munwe munye ngemva kokubhaxabula ele Moto Moto nge 13 ka nya.

Lilokhu likhokhela ngemiklomelo emine iqembu le Talen Vision ngemva kwemidlalo edlalwe ngoLwesihlanu kusigaba se Southern Region Division One Soccer League.

Iqembu le Talen Vision selilemiklomelo engamatshumi amane lathoba munwe munye ngemva kokubhaxabula ele Moto Moto nge 13 ka nya.

Iqembu le Bulawayo City elihlezi endaweni yesibili lilemiklomelo engamatshumi amabili lanhlanu njalo linqobe ele Indlovu Iyanyathela nge 5 ka nya emdlalweni odlalwe ngehola letshumi lambili emini.

Umqeqetshi weqembu le Bulawayo City uTry Ncube utshele intathelizindaba zemidlalo ukuba uyathokoza ngoba iqembu lakhe selinqoba njalo.

Kolunye udaba olufanayo ifinal eyomncintiswano wakuqala owe ZIFA Bulawayo Province Cup izadlalwa ngeSonto enkundleni ye Luveve.

Lumncintiswano ubungenwe ngamaqembu adlala kusigaba se Division 2 kanye laku Division 3 njalo angene ku final ngabalisa ele Biya and Friends kanye lele Bulawayo City Under 20.

Kumidlalo ye Castle Premier Soccer League ngoMgqibelo iqembu le FC Platinum lizemukela ele Mushowani Stars ngase Mandava kuthi ngeSonto ele Triangle lizadibana lele Yadah e Gibbo.

Esigodlweni iHarare iqembu lesizwe lizadibana lele Lesotho kuhlandla lakuqala elomncintiswano wokudinga amaqembu azakuyadlala kumncintiswano we Chan ozaqhutshelwa elizweni le Cameroon ngomnyaka ozayo.

Iqembu elimela ilizwe le Zimbabwe emdlalweni we rugby edlalwa ngabadlali abalitshumi lanhlanu liselizweni lase Kenya ukuyadlala umdlalo walo owokucina kumncintiswano we Victoria Cup.

Iqembu le Zimbabwe lingena kulumdlalo livele selinqobile kulumncintiswano ngemva kokunqoba kumidlalo emihlanu eliyidlale phambilini.

XS
SM
MD
LG