amalinks wokungena

Breaking News

Iqembu leFazak Power Raptors lele Pepsi Hawks Ayakhokhela Emdlalweni Kakhilikithi


Umdlalo kakhilikithi ...

Iqembu leFazak Power Raptors lele Pepsi Hawks emdlalweni kakhilikithi yiwo ahlezi phezu kwengalane yemiklomelo ngemva kwemidlalo yangempelaviki yakuqala eye Spar Bonsa Twenty 20 Cricket League.

Iqembu lomdlalo kakhilikithi ele Fazak Power Raptors lele Pepsi Hawks alemiklomelo eyisikhombisa iqembu ngalinye ngemva kokunqoba kumidlalo emibili edlalwe ngempelaviki edluleyo.

Iqembu le Fazak Power Raptors linqobe ele Mermaid Pool Blazers okuyilo elinqobe kumncintiswano wanyakenye ngama wickets ayithoba munwe munye ngoMgqibelo kuthi ngeSonto linqobe ele Fastjet Badgers ngama wickets ayisikhombisa.

Ngakwelinye icele iqembu le Pepsi Hawks linqobe ele Canela Sabres ngama wickets amane ngoMgqibelo kuthi ngeSonto litshaye ele National Fencing Tigers ngama runs angamatshumi amathathu lathoba minwe mbili.

Umdlali weqembu lesizwe uCraig Ervine, yena odlalela iqembu le Fazak Power Raptors, uchaze umncintiswano we Spar Bonsa njengomncintiswano oqakathekileyo kakhulu kungqubela phambili eyomdlalo kakhilikithi kwele Zimbabwe.

“Nxa ngikhangela ithalenta elilapha lumncintiswano ngowezinga laphezulu njalo kuyangithokozisa ukuba iqembu lami ele Raptors liqhuba kuhle kakhulu. Lumncintiswano we Spar Bonsa Twenty 20 uqakatheke kakhulu nxa sikhangela ikusasa eyomdlalo kakhilikithi kwele Zimbabwe njalo ngibatshayela ihlombe abaqoqi bawo ngoba udlala indima enkulu ekuthuthukiseni lumdlalo.”

UErvine ngomunye wabadlali abadlalela iqembu elimela ilizwe emdlalweni kakhilikithi abayingxenye yomncintiswano walonyaka njalo abanye ngababalisa uChristopher Mpofu, uAinsley Ndlovu, uBrendan Mavuta kanye lo uSean Williams.

Omunye njalo umdlali olodumo odlalela iqembu lesizwe uSikandar Raza ukhangelelwe ukuba khona kumidlalo yangempelaviki elandelayo.

Lo ngumnyaka wesibili kuqhutshwa lumncintiswano owe Spar Bonsa Twenty 20 Cricket League njalo uqhutshelwa endaweni ye Old Mutual Heath Streak Multi Sports Academy eyayisaziwa ngegama elithi McDonald Sports Club kudala.

Imidlalo yalonyaka isungulwe mhla zingamatshumi amabili lesikhombisa kuyonale inyanga kaNtulikazi njalo ikhangelelwe ukufika komlindi uyacina mhla zingamatshumi amathathu lanye ngenyanga kaNcwabakazi.

Facebook Forum

XS
SM
MD
LG