Inhlanganiso elawula umdlalo wenguqu eZimbabwe, eyePremier Soccer League isiyethule umbiko isazisa uzulu ukuba imidlalo yesigaba se quarter – final esomncintiswano wenkezo ye Chibuku Super Cup izadlalelwa enkundleni ye Baobab, eseMhondoro Ngezi.
Imidlalo yomncintiswano owe Chibuku Super Cup ibikwa izadlalwa ngempelasonto eyokucina kunyanga kaMfumfu mhla zingamatshumi amathathu lanhla zingamatshumi amathathu lanye.
Intathelizindaba yezemidlalo uNash Mkokwayarira uthi ukuqhutshelwa kwemidlalo le enkundleni eyodwa kuzaphuca abanye abalandela umdlalo wenguqu ithuba lokubukela limidlalo njengoba izibukeli sezivunyelwa enkundleni.
“Singakhumbula lumncintiswano uthe uqala kwakuthiwe amaqembu azaqeda ephezu kwengalane yemiklomelo yiwo azaqhubeka edlala engekhaya kodwa khathesi udaba seluguqukile.
Asazi kumbe benzela ukwehlisa indleko zalabo abathatha imifanekiso kamabonakude kodwa nxa sikhangela isimo senkundla zakwelakithi kungenzeka ukuba nxa kungadlalelwa imidlalo emine enkundleni eyodwa abazadlala ekucineni bazadlala inkundla ingasamanga kuhle,” kutsho uMkokwayarira.
Uhlelo olukhutshwe ngabe PSL luveza ukuba ngoMgqibelo iqembu le Chicken Inn lizadlala lele Ngezi Platinum Stars ngehola letshumi lanye ekuseni kuthi emini ngehola lesithathu iqembu le FC Platinum lidibane lele Highlanders.
NgeSonto iqembu le Cranborne Bullets lizadlala lele Harare City ekuseni ngehola letshumi lanye kuthi emini ngehola lesithathu iqembu le Dynamos lizangqikilana lele Black Rhinos.
Kolunye udaba olumayelana lomdlalo wenguqu inhlanganiso ye Zimbabwe Football Association isiyethule amagama abadlali beqembu labesifazane elimela ilizwe abazadibana leqembu le Eswatini kuhlandla lesibili elomdlalo we Africa Women’s Cup of Nations qualifier kusasa ozadlalelwa e Eswatini.
Onozinti ngu Lindiwe Magwede kanye lo Cynthia Shonga, abadlali baphakathi kwenkundla babalisa uNobukhosi Ncube, uSheila Makoto, uEdeline Mutumbami, uEgness Tumbare, uPurity Mugayi, uDanai Bhobho, uShyline Dambamuromo, uMarjoury Nyaumwe, ukaputeni weqembu uEmmaculate Msipha, uAlice Moyo, uChristabel Katona, uNatasha Ndowa, uPriviledge Mupeti, uMaudy Mafuruse, uRudo Neshamba kanye lo Dina Rose Banda.
Kuhlandla lakuqala iqembu le Zimbabwe linqobe ele Eswatini nge 3 ka 1 emdlalweni oqhutshelwe enkundleni ye National Sport Stadium esigodlweni iHarare.
Iqembu elizanqoba kumidlalo yomibili lizadibana lelizanqoba phakathi kwele Angola lele Botswana.
Umncintiswano we 2022 Africa Women’s Cup of Nations uzaqhutshelwa elizweni lase Morocco.