Abanye bathi badanile ngokwehluleka kwequla likaMongameli weSouth Africa uMnu Cyril Ramaphosa ukuhlangana labenhlanganiso ezilwela amalungelo kanye labamabandla aphikisayo izolo.
Njengokutsho kweZanu PF phambilini, iqula leli lihlangane leziphathamandla zalelibandla kuphela. Inengi liveze insolo yalo enkundleni zokuxhumana ezifana leTwiter.
Isikhulumeli sequla leli uMnu Ace Magashule utshele intathelizindaba ukuthi bazaphenduka ngelinye ilanga bazohlangana labamabandla aphikisayo acele ukuhlangana labo.
Amabandla la agoqela eleMDC Alliance, eleZapu, elikaMnu Simba Makoni, umeli weMelika eZimbabwe labenhlanganiso ezizimeleyo.
UMagashule uthe njengabameli bebandla elibusayo eleANC, bavumelane leziphathamandla zeZanu PF ukuthi amabandla womabili kumele ahloniphe amalungelo oluntu njalo alalele izikhalazo zikazulu.
Wengeze wathi izijeziso ezetheswa amalunga ezanu pf zenqabela intuthuko, ngakho kumele zesulwe.
Ekhuluma laye ngemva komhlangano lo, uMnu Obert Mpofu owebandla leZanu PF uthe bavumelene labeANC laba ukuthi ohulumende bamabandla womabili kumele balwise inkohlakalo emazweni abo.
Uthe njalo bavumelene ukuthi akulahlupho oluphuthumayo eZimbabwe njengokubabaza kwabamabandla aphikisayo ngaphandle kwenkinga zansukuzonke ezitholakala ngitsho lakweleSouth Africa.
Amabandla womabili athi njalo kasoze avume ukutshelwa okokwenza ngabantu athi bethula imbiko yamanga enkundleni zokuxhumana.
Inengi belikhangelele ukuthi iqula leli lihlangane lenhlangothi zonke njengokuthembisa kukaRamaphosa ukuze abantu bazikhulumele ngokwephulwa kwamalungelo oluntu abathi kwenziwa nguhulumende kaMongameli Emmerson Mnangagwa.
Kodwa isikhulumeli sebandla leZapu uMnu Iphithule Maphosa utshele iStudio7 ukuthi bazalimelela iqula leli lapho elizaphenduka khona ukuze labo baphe icele labo.
Khepha ohlaziya ezombusazwe uMnu Shephered Mpofu yena uthe sokuvele sobala ukuthi isisombululo seZimbabwe asingeke sivele kweleSouth Africa.