Ingcwethi zenotho zithi akumangalisi ukuthi ibhanga elikhulu lelizwe iReserve Bank of Zimbabwe selehlulekile ukuthengisa inkampani yalo eyakha izindlu iHomelink ukwenzela ukubhadala isikwelede esesifika ku $1.2 billion.
Ingcwethi lezi zithi umbiko owethulwe libhanga leli ngoMgqibelo otshengisa ukuthi inkampani le kayikathengwa loba yafakwa emphakathini nyakenye, ukhombisa ukuthi iswele osomabhizimusi bokuyithenga.
Eyinye yalezingcwethi uMnu. Phillip Chichoni umqondisi we Admiral Business Systems uthe kusobala ukuthi iRBZ ifuna ukuthengisa iHomelink ngemali ephezulu yona ivele ingasawenzi umsebenzi wokwakha izindlu.
Umnu. Chichoni uthe njengoba inkampani le iswele abayithengayo, iRBZ izacina ithengisa impahla yayo.
IRBZ yaqalisa nyakenye ukuthengisa amashares akunkampani le kanye lamanye anjenge Tuli Coal, Tractive Power Holdings le Astra Holdings isenzela ukubhadala izikwelede ezisindayo.
Okwamanje iRBZ isiyenelisile ukuthengisa amanye amashares ayo aku Tractive Power Holdings phose ngezigidi ezilitshumi amadollar eMelika – $9.7 million.
Umnu. Masimba Kuchera eyinye njalo ingcwethi kwezenotho uthi okwenza kubenzima ukuthi osomabhizimusi bethenge inkampani le luhlelo lwe indigenization kanye lokuswelakala kwemali elizweni.
