Inhlanganiso yeSadc, yona eqhube umhlangano wokuhlaziya udaba lweZimbabwe eSouth Africa ngempelaviki sikhuthaze amabandla akuhulumende womanyano ukuthi agcwalise konke okulokhe kulenga kusivumelwano somanyano njalo ecande indlela yokhetho ecacileyo.
Umhlangano lo uqale ngoMgqibelo waphela ngeSonto. Ekhuluma lentathelizindaba ngemva kwalumhlangano, umabhalane weSadc uMnu Tomaz Salomao uthe bafuna udaba lweZimbabwe lulungisiswe ngokuphangisa.
Amacele womabili eMDC wona athi ajabule kakhulu ngezinqumo eziphume emhlanganweni lo.
Izinqumo lezi zigoqela esithi lumanyano uzathumela iqula eZimbabwe ukuyasebenzelana leJomic emizameni yokugcwalisa isivumelwano seGPA.
ISadc inqume njalo ukuthi amabandla akuhulumende womanyano kumele acande indlela ecacileyo ezakhokhelela ilizwe ekhethweni.
Isikhulumeli seMDC ekhokhelwa nguMnu Welshman Ncube, uMnu Nhlanhla Dube uthe ingqobe isikuZanu PF ukuba ilungise konke okulokhe kuhlupha.
Amazwi akhe agcizelelwe ngumsekeli wesikhulumeli seMDC ekhokhelwa nguMnu Morgan Tsvangirai uNkosazana Thabitha Khumalo.
Abebandla leZanu PF balile ukukhuluma ngaloludaba besithi bazakhuluma ngoLwesibili. Kodwa uMongameli Robert Mugabe utshele iphephandaba leHerald ukuthi ujabule kakhulu ngempumela yalumhlangano.
