amalinks wokungena

Breaking News

Isibathwalele Ubhulo iCovid 19 abeZimbabwe AbaseGauteng kweleSouth Africa


Isabelo seGauteng Province kweleSouth Africa
Isabelo seGauteng Province kweleSouth Africa

Bethukile abeZimbabwe kweleSouth Africa ngemva kokuba isabelo seGauteng esilabeZimbabwe ababengi sekuyiso esihlaselwe yicoronavirus ukwedlula zonke elizweni. UBenedict Nhlapho usipha loludaba eseJohannesburg kweleSouth Africa.

Sekuzalele ingwe esabelweni seGauteng ngemva kwesimemezelo sikahulumende sokuthi sebesedlula izinkulungwane ezilikhulu (over 100,000) asebehlaselwe ligciwane lecoronavirus kulesisabelo. Le yinto esitshiye inengi labeZimbabwe bethwele amathumbu ngezandla njengoba kulapho inengi abafikele khona, basebenza khona bahlala khona.

Isizalwane seZimbabwe umnumnzana Jonathan Mbedzi uthi osekubuye kwafaka ibilebile esilondeni yilokhu ukuthi edolobheni leJohannesburg, lapho abanengi khona okwedlula zonke indawo elizweni kulapho leligciwane elidla khona amahabulo.

“I think kuzobanzima kakhulu ebantwini beZimbabwe ukuthi bengcwabe abantu babo ngoba kusazofiwa impela. Abantu bayafa la eGauteng. Abantu abasasebenzi ubuningi babo. Abantu abasatholi ukudla nazo zonke lezi izinto ezikhona. Ma kuyikhona ukufa sizofela khonalapha. Ma kuyikuthi asikhoni ukuyobangcwaba emakhaya abantu bakithi sizobangcwabanje khonalapha.”

Emalangeni kube lembiko engakagcizelelwa nguhulumende ethi lesi sabelo siphakathi kokwemba amangcwaba ayisigidi kulungiselelwa labo okukhangelelwe ukuthi babulawe yicoronavirus. Le yinto izizalwane zeZimbabwe ezithi isibalalisa phandle kwengubo.

Ngakolunye uhlangothi umnumnzana Greatman Mkhwebu yena uthi njengoba bekuvele kulomoyana wokungemukeli abakwamanye amazwe ezibhedlela, sebesesaba ukuthi funa labo abazobanjwa yilo umkhuhlane ngeke baphume ezibhedlela.

“Kutsho ukuthi amangcwaba la azogcwala thina. Kutsho ukuthi ma ungenanje uyiforeigner they will do okwakuvele kusenzeka ungena esibhedlela last time ukuthi ma ungelazincwadi awuvunyelwa ukungena ezibhedlela kumele kuncedwe amaSouth Africans first. So kunzima abantu kufanele baziphathe ngoba ungaya esibhedlela sekungenzeka ungajiki.”

Umgcinisihlalo wenhlanganiso yeZimbabwe Community in South Africa umnumnzana Ngqabutho Mabhena uthi vele lumkhuhlane usuqalisile ukuhlasela kuzulu weZimbabwe kweleSouth Africa.

“Kumele sizame ukwenza lokhu ngolwemnzini abathi yisocial distance. Singahambi endaweni lapho okugcwele khona abantu. Kumele ma siphuma emakhaya sifake ama mask sigeze izandla. Kumele futhi ma ubuya emsebenzini ufuthe. Kumele ungesabi ukunuka umlomo udle amagarlic lalezi ezinye izinto abathi sizidle.”

Okwamanje sebebanga kunkulungwane ezingamakhulu amathathu (about 300,000) asebehlaselwe ligciwane lecoronavirus kweleSouth Africa kanti sebesedlula izinkulungwane ezine (over 4000) asebefile.

XS
SM
MD
LG