Isibhedlela seThorngroove sakoBulawayo, namhlanje sithole uncedo lwezipho ezehlukeneyo zokusebenzisa ekuvikeleni ukuthelelanwa lula ingcikwane leCovid-19, ikakhulu kuzisebenzi zezempilakahle. Lezi zipho zivele ebantwini abathile, inhlanganiso ezizimeleyo lezemidlalo.
Abenelise ukwelula izandla benikeza lesi sipho bagoqela uhlelo olwasungulwa ngumsakazi wakoBulawayo owaba lodumo esebenzela iZBC osesebenza njalo kuStudio 7, olweEzra Tshisa Sibanda Initiative, abenhlanganiso yeDanish Church Aid, abeqembu lomdlalo wenguqu eleChicken Inn Football Club loAdelaide Shearly onikeze isipho sezigqoko lezicathulo, kwasebekhulile abahlala emzini wekuEkuphumuleni Old People’s Home.
Limpahla egoqela ama mask, amgloves lokunye ijonge ukusetshenziswa ekuvikeleni ukumemetheka komkhuhlane weCovid-19.
Udokotela Solwayo Ngwenya emele uEzra Tshisa Sibanda lnitiative uchasisa ngalesi sipho sabo.
‘’Lapha besizomela iEzra Tshisa Sibanda Initiative sizoletha izipho zokuvimba ukumemetheka kwe COVID -19 eThorngrove Hospital okubalisa amagloves, gowns lokunye okuhlukeneyo.’’
Umnu Juda Ngwenya omele iChicken lnn Football Association uthi bakubone kubalulekile ukupha imithi yokuvikela ukumemetheka komkhuhlane weCovid-19.
‘’Siphe amasanitizers angamatshumi amahlanu asezikubhini zama5lts, amadish washers angamatshumi ayisifica minwe mibili lane kunye lezinkwa ezingamatshumi amahlanu isizatho kuyikuthi sihlanganele ekulwiseni iCovid 19 emhlabeni lathi sithe sibambane lelizwe kanye lomhlaba ekulwisaneni lalo umkhuhlane.’’
UNkosikazi Adelaide Shearly uphe impahla abemzini ogcina asebekhulile oweEkuphumuleni Old People’s Home ethi kubalulekile ukupha impahla ezikhudumalayo.
‘’Lamhlanje ngiphe izigqoko lezicathulo zomqando Ekuphumuleni Old People Home ukuze ogogo bengangenwa ngumqando lami ngithe ngihkanganise amakhanda labanye ngalesisikhathi.’’
UMayor wakoBulawayo, uMnu Solomon Mnguni ubonge kakhulu izipho abazithole lamhlanje.
‘’Okuqakathekileyo yikuthi abantu bakoBulawayo kungakhathalekile ukuba bakuphi komhlaba lokhe beqhubeka benceda uBulawayo ukuvikela ukumemetheka komkhuhlane weCOVID-19. Lamhlanje sibone abe Ezra Tshisa Sibanda Initiative bemelwe nguDokotela Solwayo, abeDanish Church Aid, iChicken Inn Football Association, uNkosikazi Shearly siyabonga kakhulu.’’
Umphathintambo wakoBulawayo uNkosikazi Judith Ncube laye ubonge kakhulu izipho ezitholiswe lelidolobho. UNkosikazi Ncube uhle wathatha lelithuba lokubikwa ukuba uhulumende usetholise idolobho inkulungwane ezilitshumi zokulungisa imigodi yamanzi eNyamandlovu ukuze idolobho lithole amanzi.
“Kumbe uphe iThorngroove, iMpilo, iUBH le Ekusileni kumbe amakilinika ethu kuyafana lokuba lisukumele ukumelana leCovid-19. Siyabonga kakhulu ngezipho elisipha zona ezweni lani elisemazweni siyabonga kakhulu ngemisebenzi emihle. Ngisuka khonapha ngiyakwamukela umgodi wamanzi ogejwe ngabanye esibhedlela seEkusileni.’’
UBulawayo okwamanje ulabantu abalitshumi asebefunyenwe belegcikwane leCovid-19, selibulele oyedwa. lzipho ezitholakale lamuhlanje zikhangelelwe ukusebenza ekumelaneni lemikhuhlane. Okwamanje isibhedlela siphakathi kokulungiswa ukuba silungele ukugcina abantu abangafunyanwa sebeleCovid-19 sebegula.