Isidumbu sowayengumongameli Robert Mugabe sifike eHarare NgoLwesithathu lapho esihlangabezwe ngumongameli Emmerson Mnangagwa leziphathamandla zikahulumende egcekeni lendizamtshina ele Robert Gabriel Mugabe International Airport sivela kwele Singapore lapho abhubhele khona ngoLwesihlanu lweviki edluleyo.
Isidumbu sibuye lomfelokazi wakhe uNkosikazi Grace Mugabe, imuli yakhe kanye lequla likaHulumende elithunywe kwele Singapore ukuyalungisisa ingwalo zokulethwa kwaso ebe likhokhelwa ngumsekeli kamongameli uMnu. Kembo Mohadi kanye loMnu. Sidney Sekeramayi.
Emazwini ache enduduzo awakhulume esilindweni sendizamshina, uMnangagwa uthe uzulu weZimbabwe ulahlekelwe liqhawe.
“Sibuhlungu njalo siduduza umfelwakazi osilethele isidumbu umama uMugabe esilaye lapha labantwana lemuli abalapha. Uzulu wonke weZimbabwe, abantu bethu bonke jikelele bayakhala”
Uqhubeke encoma umsebenzi owenzwa nguMugabe ekukhululeni ilizwe lisuka embusweni wabahuquluzi njalo wayengasi qhawe leZimbabwe kuphela kodwa elezwekazi lonke leAfrica ngoba wayelwela amalungelo abantu bonsundu.
“Indoda ekade iliqhawe lamalungelo abantu bezwekazi leAfrica. Yiyo indoda eyabumba isizwe sethu yasiletha lapha namhlanje. Indoda le isisitshiyile.
Kodwa umnumzana Costa Ndlovu ongomunye wabasekeli bakaMugabe abaze ukuzokwamukela isidumbu uthe ujabule kakhulu ukuthi umuyi ufike kuhle.
“Khonokho okokuthi isidumbu sakhe sesifikile siyakujabulela khonokho njal;o sikhangelele ukuzwa ngohlelo lwakhona sisiyaphambili njengoba sizwe umongameli ekhuluma ukuthi okulandelayo uzasitshela ukuthi umngcwabo wakhona uyabe ungaphi. Nxa kuyikuthi siyahamba koZvimba siyakujabulela kakhulu siyahamba siyemngcwaba sibili uRobert Mugabe.”
Lokhu kuncindezelwe ngomunye wabakade bekhona behlabela unkosikazi Nyasha Hove yena othe uMugabe uliqhawe lamaqhawe.
“Hamba kahle mdlala wethu khulu wethu. Qhawe lamaqhawe”
Isidumbu sika Mugabe siyakuyalala emzini wakhe oweBlue Roof emzini weBorrowdale eHarare ngoLwesithathu.
Uzulu ukhangelelwe ukuyavalelisana loMugabe enkundleni yeRufaro Stadium ngoLwesine. Kuthi ngoMgqibelo yikho okuzaba lombuthano ogoqela inkokheli zamanye amazwe labanye abahloniphekayo wokumvalelisa enkundleni yeNational Sports Stadium.
Abasekeli beZanu PF babuye ngobunengi bezokwamukela iqhawe labo kanye lokuthabela impilo ayiphilayo ngendlela ezitshiyeneyo eziqoqela ukuhlabela kanye lokugida. Loba kungakabi sobala ukuthi uzangcwatshelwa ngaphi.
UMnangagwa uthe uzulu uzakwaziswa ngalapho uMugabe azabekwa khona kunsuku ezilandelayo. Lokhu kuza ngemva kokuba imuli yakhe ingakavezi phezu kwenyathela eliyithetheyo.
