Kuliviki esigabeni sethu lapho esikhangela impilo yezizalwane zeZimbabwe esezihlala kwamanye amazwe umsakazo weStudio Seven uxoxa lomnumzana Phillip Sibanda yena osehlala eManchester kweleBhilithane.
USibanda ubuthanisa impahla ezindala ezigoqela izigqoko, izichathulo lokunye okokusebenzisa loba okudlaliswa ngabantwana okunjengamatoys, abe esiyakwabela abantwana, intandane, izihlobo labangane abaswelayo eZimbabwe.
Uqhubeke ethi yena uqale lolu hlelo eminyakeni ethile edluleyo ecela kubomakhelwane bakhe abelungu khonale eManchester izigqoko zabo ezindala ikakhulu amajesi, izichathulo lokunye ukuze ayekwabela abantwana babangane bakhe athi esethekelela ekhaya okwakuqala ngemva kweminyaka esukile wafumana inengi labo selifile litshiya abantwana bezintandane.
"Ngaba lokudana okukhulu kubona abantwana babangane bami behamba ngenyawo besiya esikolo ngesikhathi somqando bengela zigqoko ikantike ngasemazweni abantu balezigqoko ezinengi ezinye abangazisebenzisiyo lokuzisebenzisa, ngasengikubona kufanele ukuthi ngizibuthanise ngiyebanika labo basizakale"
Okwakhathesi soluqelile lolu hlelo uthi uSibanda sowaze waba lesikolo sentandane esilabantwana abedlula amakhulu amane akhetha ukubancedisa ngokubaphathela izembatho lokunye.
