Inengi labantu lithi lilokhu lisehluleka ukuziphilisa ngoba amankampani alokhu eqhubeka evalwa njalo abantu belahlekelwa yimisebenzi, ngesikhathi inhlanganiso kahulumende eye Zimbabwe Statistical Agency isithi umnotho welizwe uqhubeke usiwa ngenyanga ezimbalwa ezedluleyo.
Lokhu kwenzakala inengi eliphila ngokulima lisithi izilimo sezitshile emisimini ngokuswelakala kwezulu, kukanti ugatsha olubona ngeziphathelane lomumo womkhathi olwe Metereological Services elizweni luthi akulampawu ezitshengisa ukuthi kulezulu eleneleyo elizayo.
Ukuhlaziya eziphathelande lomnotho welizwe, uSithandekile Mhlanga weStudio 7 uxoxe loNkosikazi Rita Ndlovu, isiphathamandla sebandla leMDC elikhokhelwa nguMnu. Welshman Ncube endawonye loMnu. Ambrose Sibindi, isiphathamandla senhlanganiso elwela amalungelo ezisebenzi eye ZCTU kanye leye Bulawayo Progressive Residents Association.
UMnu. Sibindi usungula lingxoxo ngokuchasisa ukuthi impahla zamankampani amalutshwana alokhu esebenza zincintisana lezivela eChina ezitshiphileyo.