Isikolo semfundo ephansi eyabantwana ese creche esakhiwa yizakhamizi ze Plumtree eGasavu ese Beacon Hill Pre-School, sesilungele ukusebenza uhulumende engathi izikolo zivulwe. Lokhu kuvezwa ngu Nkosazana Sikhululekile Amelia Bhoboza Sibanda onguye obhadala indleko zalesi isikolo, othi wasebenzisa imali ephuma esikhwameni sakhe njalo waphathiswa ngumphakathi, umanasipala walindawo, labanye ukuthi asakhe.
UNkosazana Sibanda, uhlala eWashington DC eMelika, njalo uthi wayevakatshele ekhaya lakhe ePlumtree ukuyaphutshisa loluhlelo lokwakha isikolo lapho afumana ukuthi umkhuhlane weCOVID 19 ubhahile njalo ubuyisela emuva umsebenzi wakhe.
Uthi enye ingxaki abhekane layo okwamanje ngeyokuthi kasatholanga imota yokuthwala abantwana abasuka kude besiya kulesi isikolo lanxa wayibhadalela ngoba umuntu okufanele ayilethe kasabonakali njalo secitshile locingo lwakhe lukamakhalekhukhwini.
Kodwa uthi lanxa kube lengxaki ezithile wenelisile ukuthengela abantwana konke okudingakalayo okubalisa ama-mattress, imibheda, isitofu, izitulo, amathala okufundela lawokudlela, kanye lamabhuku.
Phezu kwalokho, uNkosazana Sibanda uthi konke okudingwa ngabahlolisisa ukuthi isakhiwo singasebenza sokwatholakala. Lokhu kubalisa imitshina yokucitsha umlilo ungalumatha; ama fire extinguisher, i plumping, izambuzi, lokunye.
Uthi ukhangelele ukuthi isikolo lesi siqheliswe kube lezifundo ze primary school ezifika kuGrade 7 kuthi ntambama abadala besisebenzise ukufundela imisebenzi yezandla engabalethela inzuzo.
Umsakazo weStudio 7 waxoxa loNkosazana Sibanda ngoMpalakazi ngomnyakaka odluleyo, lapho achasisa okunengi ngendlela asungula ngalo loluhlelo. Uthi abalalela lingxoxo, ikakhulu abavela esigabeni sakhe sePlumtree lakwezinye indawo zeMatabeleland, bathokoza ngokwakhiwa kwalesi isikolo, njalo bathumela imbiko eyamkhuthaza ukuthi asebenze gadalala ukuthi aphutshise loluhlelo.