amalinks wokungena

Breaking News

Isimisize Yonke Imidlalo Yokuzilibazisa Ngenxa yeCovid-19


Dynamos-v-Highlanders

Ikhomishini elawula ukuqhutshwa kwezemidlalo eZimbabwe eyeSport and Recreation Commission (SRC) isimise yonke imidlalo njengengxenye yemizamo yokuvikela ukumemetheka komkhuhlane weCovid-19.

Incwadi elotshwe yilikhomishini ithi imidlalo yonke imiswe kusukela ngoMvulo zilitshumi lane kunyanga kaNhlangula mpaka kuze kuyefika isikhathi lapho uhulumende azayekethisa khona imigoqo yokwenqabela lumkhuhlane njalo atsho lokuthi lemidlalo isingaqhubeka.

Lokhu kuza ngemva kokuba umphathintambo wogatsha lwezempilakahle uMnu Constantine Chiwenga ethule umbiko ovimba yonke imbuthano kanye lokuqinisa limigoqo.

Lokhu kutsho ukuba lemidlalo yeChibuku Super Cup ebimele idlalwe kuliviki isimisiwe.

“Ngokubona kwami ukumiswa kwezemidlalo kuyindaba enzima kakhulu ikakhulu ebadlalini ngoba phela kwabanye abantu ezemidlalo zingumsebenzi,” kutsho intathelizindaba yezemidlalo uNash Mkokwayarira.

“Ungakhangela kuvele bekulenhlelo ebeziqhutshwa ngabemidlalo etshiyeneyo okokuthi bekuzakuba ngcono aluba bayekelwe baqhubekela phambili bedlala kodwa benanzelela ukuba kabayephuli imigoqo efakwe ukuze bevikeleke emkhuhlaneni we Covid-19.”

Lanxa abenhlanganiso yeZimbabwe Cricket bekhuphe umbiko besithi sebemisile inhlelo zabo, balobe incwadi belabhela kunhlanganiso yeSRC becela imvumo yokuba beqhubeke ngemidlalo yabo.

Ezemidlalo zimiswe ngesikhathi iqembu leZimbabwe A lingqikilana leleSouth Africa A emdlalweni weCricket owohlobo oludlalwa phakathi kwensuku ezine.

Owake waba yisiphathamandla senhlanganiso ebona ngokuqhutshwa komdlalo wenguqu elizweni eyeZimbabwe Football Association uSiphambaniso Dube uthi ukumiswa kwezemidlalo kulakho ukudala ingxabano phakathi kwamaqembu labadlali.

“Ngendlela okwenzakale ngayo kwelakithi lapha, amaqembu azamile ukubhadala abadlali loba bebengadlali. Kuthe lapho izivumelalwano zomsebenzi sezifike emaphethelweni abadlali basuka bazihambela mahala. Pho ke nanso ilockdown isifikile njalo okuzakwenzakala yikuthi amaqembu azakuma ukubhadala abadlali bacine sebelamba,” kutsho uDube.

Amaqembu adlala kusigaba sePremier Soccer League abe phakathi kwemidlalo yeChibuku Super Cup yona ebisifike phakathi laphakathi.

Ngemva kwalimidlalo yikho lapho obekuzaqala khona imidlalo yeligi yalonyaka.

Umbiko okhutshwe ngumphathintambo wezempilakahle uthi akusavunyelwa ukuba abantu babuthane bedlule amatshumi amathathu njalo abantu bavunyelwa ukubuthana emfeni kuphela.

please wait

No media source currently available

0:00 0:02:29 0:00

Facebook Forum

XS
SM
MD
LG