amalinks wokungena

Isisekelo Esitsha Siqakathekisa Zonke Indimi

  • Ntungamili Nkomo

Lanxa amabandla akuhulumende ezitshayi'sifuba ngokwenelisa ukugqiba umsebenzi wokuloba isisekelo sombuso esitsha, uzulu uthi kukhona angasuthiseki ngakho kulesi sisekelo okugoqela udaba lombuso wezabelo, idevolution.

Ekomiti eqhuba loluhlelo igqibe lumsebenzi ngoLwesithathu njalo ugwalo lwesisekelo lesi, idraft constitution sisezandleni zabanengi. Udaba lokuzibusa kwezabelo lukhona kodwa akucaci kuhle ukuthi luzahanjiswa njani.

Lanxa kunjalo, kukhona okujabulisayo uzulu athi uyakwamukela ngezandla zombili, okufana lodaba lwe-dual citizenship.

Lokhu kutsho ukuthi abahlala kwamanye amazwe abazalelwa eZimbabwe kanye labantwababo bavunyelwe ukuthi baqhubeke beyizizalwane zeZimbabwe lanxa bengaze babe lengwalo zakwamanye amazwe.

Olunye udaba olujabulise abanengi ngolokulinganiswa kwendimi. Esikhathini esedluleyo, isiShona, isikhiwa lesiNdebele yizo zodwa indimi ebeziqakathekiswa njalo zinanzwa okusemthethweni.

Kodwa isisekelo esitsha sithi zonke indimi ezikhulunywayo elizweni sezinanzwa phansi kwemithetho yelizwe.

Indimi lezi zibalisa isiKalanga, Chewa, Chibarwe, Nambya, Ndau, Shangani, Tonga, Sotho,Tswana, Venda, Xhosa, ulimi lwabantu abangakhulumiyo isign language kanye leKoisan, ulimi lwabathwa.

Isisekelo lesi sithi njalo umongameli welizwe kumele ahlale embusweni okwamahlandla amabili kuphela, ihlandla elilodwa lileminyaka emihlanu. Lokhu kutsho ukuthi umongameli uzaba sesihlalweni okweminyaka elitshumi kuphela abe sededela abanye.

Sithi njalo umongameli sezakhetha abasekeli bakhe ababili kungakayiwa kukhetho, njalo nxa ethe wehlelwa ngokwenza ehluleke ukuqhubeka esesihlalweni, umsekeli wakhe wakuqala nguye ozathatha intambo zombuso aqedise indima.

Lokhu yikho okwenzakala emazweni afana leMalawi leMelika. Isisekelo lesi sithi njalo abesifazana akumelanga bagwetshelwe ukulengiswa.

Ingcwethi kwezombusazwe uMnu Effie Dlela Ncube njalo ekhokhela inhlanganiso ekhankasela isisekelo esipha izabelo umbuso wokuzibusa iMatabeleland Constitutional Reform Agenda uthi kasuthiseki ngalesi sisekelo.

IManagement Committee ikhangelele ukunikeza isisekelo lesi kunkokheli yamabandla kunsukwana ezizayo.

Kusuka lapho izaqhuba umhlangano weAll-Stakeholders Conference ihlafuna lolugwalo lozulu, andubana luye kureferendum uzulu atsho ukuthi uyasamukela yini isisekelo esitsha kumbe hatshi.

IStudio 7 ixhume olwela ilungelo loluntu uMnu Zenzele Ndebele yena othi uyakwamukela ukunanzwa kwendimi zonke, kodwa uthi ukuze zithuthuke ngokugcweleyo, kumele zifundiswe ezikolo.

XS
SM
MD
LG