Ikomidi yedale lephalamende ebona ngokulotshwa kwesisekelo sombuso esitsha, eye COPAC, ithi isisemaphethelweni ohlelo lokuqoqa imbono yabantu ezangena kulolugwalo ezigabeni ezinengi zelizwe.
UMnu. Edward Mkhosi, omunye wabagcinisihlalo be COPAC, utshele uSithandekile Mhlanga weStudio 7 ukuthi izigaba ezigoqela iBulawayo,iMasvingo, iMidlands leMatabeleland zingaqedisa loluhlelo ekupheleni kwayonale iviki kumbe ezayo, njalo izigaba ezidonsela emuva yi Manicaland le Harare.
Icele le MDC elikhokhekhelwa nguMnumzana Arthur Mutambara lithi lilethemba lokuthi isisekelo sombuso esiphakathi kokulotshwa sizakwamukelwa nguzulu weZimbabwe, laloba uhlelo lokwamukelwa kwemibono kazulu belubhekane lendubeko ezinengi kwezinye izigaba zelizwe.
Ibandla leli lisola inhlanganiso ezithi zikhankasela ukuthi uzulu ale ukwamukela ugwalo lwesisekelo oluzakwethulwa ngaphambilini kwaso isisekelo uqobo.
Inhlanganiso yeNational Constitutional Assembly esileminyaka ikhankasela isisekelo esitsha elizweni isola kakhulu ukuqhutshwa kohlelo lokwamukelwa kwemibono kazulu, isithi aluqhutshwanga ngendlela esuthisa uzulu.
I NCA ihlezi isithi izakhankasela i “No vote” ngesikhathi sereferendum.
UBrenda Moyo weStudio 7 ukhulume lonobhala obona ngokufundiswa kwezombusazwe kubandla leMDC elikhokhelwa nguMutambara, uMnumzana Albert Masotsha Ndlovu othi kesemasinyane kakhulu ukuthi abantu baqale ukusola uhlelo lolu lokulotshwa kutsha kwesisekelo sombuso.
