amalinks wokungena

Breaking News

Isisemaphethelweni Imidlalo eyeCastle Lager Premier Soccer League


Imidlalo yeCastle Lager Premier Soccer League

Imidlalo yalonyaka eyenguqu eyesigaba seCastle Lager Premier Soccer League ifika komlindi uyacina kulimpelaviki.

Intshantshu zalonyaka ezomdlalo wenguqu kusigaba saphezulu ese Castle Lager Premier Soccer League zizakwazakala ekupheleni komdlalo ozakuba phakathi kweqembu le Caps United lele FC Platinum ozaqhutshelwa enkundleni ye National Sports Stadium ngoMgqibelo.

Lawamaqembu azangena kumdlalo wangoMgqibelo, iqembu le FC Platinum, okuyilo eliphethe isicoco seligi ngemva kokunqoba eminyakeni emibili eyedluleyo, lihlezi phezu kwengalane lilemiklomelo engamatshumi amahlanu lathoba munwe munye, kuthi ele Caps United lihlezi endaweni yesibili lilemiklomelo engamatshumi amahlanu lathoba minwe mbili.

Isimo sengalane siveza ukuba iqembu le FC Platinum lidinga nje umklomelo owodwa ukuba ligcotshwe njalo ukuba zintshantshu zakwele Zimbabwe okungaba ngokwesithathu iminyaka ilandelana ukuba liphakamise isicoco.

Iqembu le Caps United lihlale okwesikhathi eside liphezu kwengalane yemiklomelo kodwa lehle layahlala endaweni yesibili ngemva kokunqotshwa elikwenziwe liqembu le Ngezi Platinum Stars nge 3 ka 2 ngoLwesithathu olwedluleyo kwathi ele FC Platinum lona linqobe ele Black Rhinos nge 1 ka nya.

Emsileni wengalane lakho kulamaqembu amabili azalandela eleMushowani Stars lele Hwange ekuyeni dlala kusigaba sika division one ngemva kwemidlalo yakusasa.

Amaqembu asengozini eyokugunyulwa kusigaba saphezulu ngabalisa aysithupha athi ele Yadah, ele Herentals, ele Bulawayo Chiefs, ele TelOne, ele Harare City kanye lele Chapungu.

Iqembu le Yadah lona elihlezi endaweni yesithathu nxa usuka emsileni, lilemiklomelo engamatshumi amathathu lathoba minwe mbili njalo lizadlala lele Mushowani Stars, iqembu le Herentals lona elihlezi endaweni yesine nxa usuka emsileni, lalo lilemiklomelo engamatshumi amathathu lathoba minwe mbili, lizavakatshela ele Bulawayo Chiefs lona elilemiklomelo engamatshumi amane lowodwa njalo elidinga umklomelo owodwa kuphela ukuba lisinde ekugunyulweni kusigaba saphezulu.

Umqeqetshi weqembu le Bulawayo Chiefs uThulani Sibanda utshele intathelizindaba ukuba abafana bakhe kuzamela babophe ziqine ngoba bengayekethisa bengazithola sebegunyuliwe.

“Akumelanga siyekethise ngoba sekungenzakala loba yini. Iqembu le Herentals lile goal difference engcono kuleyethu njalo amaqembu amanengi alwisa ukusinda ekugunyulweni lawo asesimeni esifanayo nxa eqathaniswa lathi. Ngalokho ke kumele siqine ngalokho okwenze ukuba siyale silokhu sikhuphuka engalaneni kumidlalo eyedluleyo ukuze sibe lesiqiniseko esokuphepha engozini eyokugunyulwa,” kutsho uSibanda.

Amanye amaqembu asengozini ngabalisa ele Chapungu lona elilemiklomelo engamatshumi amathathu lathoba munwe munye njalo elizadibana lele Highlanders ngoMgqibelo.

Iqembu le Highlanders lilwisa ukuphutsha imidlalo yalonyaka lisendaweni yesine okutsho ukuba lumdlalo kawusoze ube lula kuqembu le Chapungu.

Elinye iqembu elisesimeni esifana lese Chapungu ngele Harare City lona elilemiklomelo engamatshumi amane njalo elizadlala lele Ngezi Platinum Stars lalo elilethuba elihle elokuphutsha imidlalo yalo lisendaweni yesine engalaneni yemiklomelo.

Iqembu le Telone ngelinye lalo iqembu elisengozini eyokugunyulwa njalo lizadibana lele Chicken Inn kusasa enkundleni ye Barbourfields emdlalweni ongaba lobunzima kilo ngoba iqembu le Chicken Inn lithiye ukuqeda lisendaweni yesibili engalaneni yemiklomelo.

Kweminye imidlalo ezadlalwa ngoMgqibelo, kusigaba se PSL iqembu le Triangle lizadlala lele Dynamos ngase Gibbo kuthi iqembu le Hwange lizadlala lele ZPC Kariba ngase Colliery.

NgeSonto iqembu le Black Rhinos lizangqikilana lele Manica Diamonds ngase National Sports Stadium.

please wait

No media source currently available

0:00 0:03:07 0:00

Facebook Forum

XS
SM
MD
LG