Inengi lithi liyathokoza ngokuthi isitimela senkampani yeNational Railways of Zimbabwe sesiqalisile ukuthwala abantu edolobheni lakoBulawayo njalo imbadalo yaso iphansi kuleyemitshova.
Isitimela lesi esiqale lumsebenzi ngoMvulo, sithwala abantu sisuka Esigodweni ngo5:35 ekuseni, sifike koBulawayo ngo 7o’clock. Sidlula ezititshini ezise Greenroofs, Luveve, Cowdray Park Level Crossing, Entumbane, Nguboyenja, Mpopoma, leWestgate andubana siyekuma koLoliwe edolobheni.
Isiphathamandla sebandla leMovement for Democratic Change, uMnu. Collet Ndlovu, owayengukhansila weCowdray Park, oxoxe leStudio7 ngoMvulo ntambama uthi lanxa kulinyathelo elihle elithethwe nguLoliwe, kulengxaki ezithile okufanele zilungiswe.
Isitimela lesi sakesabakhona ngesikhathi umnotho welizwe leZimbabwe usugugudeke okumangalisayo.
Kusenjalo, amavinkili amanengi abikwa eqhubeka esala ukwamukela imali yamabond kanye lamaRTGs esithi afuna idollar leMelika kuphela.
Amanye amavinkili abamba abantu ngamandla ukuthi bathenge impahla yentengothoze ukuze bavunyelwe ukuthenga impahla esilelayo efana lamafutha okupheka kanye letshukela.
Le yinto esolwa kakhulu ngonobhala jikelele wenhlanganiso yezisebenzi iZimbabwe Congress of Trade Unions, uMnu. Japhet Moyo.
