Umanyano wamabandla, owe MDC-Alliance ulakho phazamisa inhlelo zamabandla aphikisayo ngoba ungacaci kwezinye izigaba zesivumelwano sawo okwenza amalunga amabandla akumanyano lo agxobane ikhonzi.
Inhlamvu zesivumelwano salumanyano besingakaze zaziswe uzulu selokhu abakhokheli bamabandla basisayina nyakenye ngenyanga ka Ncwabakazi.
Amabandla akumanyano lo abalisa iMDC-T, iMDC – Welshman Ncube, PDP, Transform Zimbabwe, MDC le Zanu Ndonga.
Esinye isahluko salesi sivumelwano sithi amabandla la awasoze asebenzelani kokunye okungasikho kokhetho.
Lesi sivumelwano siyakubeka sobala ukuthi ibandla elimele likhethe ozamela lumanyano yiMDC-T.
Sikhuluma nje sekuhle kwaba ukudonselana amandla kwamalunga, uMnu. Obert Gutu owe MDC-T loMnu. Tendai Biti owe PDP kubangwa isikhundla sozamela isigaba se Harare East edale lephalamende.
Okunye okutshengisa ukuthi isivumelwano lesi asisoze sisebenze kahle yikuthi ngemva kokhetho amabandla la azaqhubeka engasebenzelani kodwa wona ancedisana kukhetho.
Sixoxe lomkhokheli webandla leMDC, uMnu. Welshman Ncube saqala ngokumbuza ukuthi isivumelwano lesi sizasebena na, nanku umkhokheli womanyano we MDC-Alliance, uMnu. Morgan Tsvangirai ekhululwa ngumkhuhlane lona ukhetho seluzafika.
“Kusivumelwano esikhona, savumelana ukuthi umuntu ongasimela ngcono ngemibono yethu ngubaba uTsvangirai. Ngakho sabhala ku agreement ukuthi nguye ucandidate we Alliance ku presidential election,” kutsho uNcube.
Uthi ngaphandle kokuthi kuhlalwe phansi njalo kuthiwe sekufunakala omunye ozamela lumanyano uTsvangirai uzaqhubeka ewokhokhela loba kuyabe kulokudonselana okuyabe kukhona.
“Ngaphandle njalo kokuthi ubaba uTsvangirai abuye kithi athi hayi mina ngombono wami sebngibona ingazani ngiyehluleka ukuthi ngithathe isikhundla lesi ngenze umsebenzi wokuba yi candidate. Asikafiki kuleso sigaba yikho sisithi ucandidate wethu silaye,” kutsho uNcube.
