IConsulate yeZimbabwe kweleSouth Africa isivuliwe njalo ikhuthaza abafuna usizo ukuthi bangabonakali sebethe thutshu kodwa baqale babhalise ekhelini yeCondulate kuinternet ukuze baphiwe ilanga lokuzothola usizo lwengwalo ezitshiyeneyo.
Okhokhela iConsulate yeZimbabwe kweleSouth Africa uNkosikazi Melody Chaurura utshele iStudio 7 ukuthi ukuvulwa kwamahofisi eConsulate kulandela ukuvala okwesikhathi eside kulandelwa iziqondiso zakweleSouth Africa yokwenqabela ukumemetheka kweCoronavirus.
Uthi abafuna yiloba yiziphi incwadi ezitholakala eConsulate yeZimbabwe eJohannesburg loba eCapeTown sebengaqala ukuzodinga lezi incwadi. Kodwa uthi abazukwemukela umuntu ozabonakala esethe thutshu.
“Sezivuliwe inhlelo zeConsulate kugoqela ukuthathwa kwamaphasipoti lencwadi zokuzalwa kodwa kufanele ubhalise ukuze sikuvumele ungene.
Uthi labo abafuna ukuza kula ama office kuzafanale baqale babhalise ekhelini elisebulenjini be internet ku https://www.zimbabweconsulate.co.za/appointment ukuze baphiwe ilanga lesikhathi sokuza.
“Isikhathi osiphiweyo kufanele usibambe njalo ungatshintshani lomunye ngoba singedlula sedlule.”
Uthi akekho ozakwemukelwa kungelabufakazi bokuthi uqale wabhalisa waphiwa imvumo yokuza. Abasoke bavumele njalo umuntu ozathi kunguye obhalisileyo kucine sekusiyathutsha umngane wakhe loba isihlobo.
Unkosikazi Chaurura uthi inhlelo zalabo abafisa ukuthwala izidumbu zezihlobo zabo zisiya ngcwatshwa ekhaya zilokhu zivuliwe kantike lakho lokhu kubhaliswa ekhelini lebulenjini be internet njengobekuvele kusenzeka ezinye inhlelo zingakavulwa.
Laboke abafisa ukubuyela ekhaya ngoba impilo isinzima kweleSouth Africa unkosikazi Chaurura uthi kufanele bathintane lehofisi yakhe beseke bekhetha ukuthi bazahamba ngebhasi, indizamtshina loba imota zabo njengoba indleko zohambo lolu kuyibo abazikhokhelayo.
Ukuvulwa njalo kweConsulate sekwemukelwe ngezandla zombili yizizalwane zeZimbabwe inengi labo abalamaphasipoti abesephelelwe yisikhathi.
Umgcinisihlalo wenhlanganiso emela abeZimbabwe kweleSouth Africa eyeZimbabwe Community in South Africa umnumnzana Ngqabutho Mabhena, ukhuthaza izizalwane zeZimbabwe ukuthi zikhuthale ziyethatha amaphasipoti ukuze ziqhubeka zihlala kuleli ngokusemthethweni.
“Sikhala ngentengo yemali yoku aplaya amapassport ngoba yi$318 okutsho ukuthi yimali engaba yi R5000. Siyakwazi ukuthi lokhu sikulockdown, Abantu abanengi abasebenzi abasebenzayo khona beqala umsebenzi khathesi. Abalayo imali engako. Yikho siyakhala kuConsul ukuthi bakhulume le office ka Registrar General ukuthi imali yephasipoti kayehliswe.”
UMabhena uthi sebefake njalo isicelo sokuthi kube yiyo iConsulate ethumela amafomu okuthatha iphasipoti ekhaya kuphinde kube yiyo futhi eletha amaphasipoti aphumileyo kweleSouth Africa njengoba imingcele ilokhu ivaliwe.
