amalinks wokungena

Breaking News

Isivumelwano Sokwabelana Amashares Awe Old Mutual Kusolwa Ngezinye Ingcwethi Zenotho


Ingcwethi kwezenotho zilembono etshiyeneyo ngesivumelwano sikahulumende lenkampani ye Old Mutual eyethule umbiko ngoLwesithathu othi isilungiselela ukufaka ezandleni zabansundu amashares ayo ayisilinganiso sokungamatshumi amabili lanhlanu ekhulwini kuhlelo lokwabelana amashares amankampani emazweni olwe indigenization.

Eyinye yalezingwethi uMnu. Eric Bloch uthi isivumelwano lesi kasisoze sithuthukise inotho ye Old Mutual njengoba amashares la azatholwa yizisebenzi, abalama policies atshiyeneyo kiyo, abakuhlelo lwayo lwepentsheni kanye logatsha lwabatsha lukahulumende, azathengwa ngezikwelede ezivela kunkampani le.

Umnu. Bloch uthi amankampani emazweni ase Zimbabwe kawakabi kusigaba sokuthi anganika abantu makhaza amashares njengoba efuna imali yokuthuthukisa inotho yawo.

Kodwa-ke uMnu. Rejoice Nngwenya ocubungula ezenotho njalo uthi okwenziwe yi Old Mutual kuyancomeka ngoba inkampani le izama ukuthuthukisa inotho kazulu ingahlukumezwa nguhulumende.

Umnu. Ngwenya uthi amanye amankampani alakho ukulandela okunjengalokhu okenziwe yi Old Mutual kuhlelo lwe indigenization.

Kusenjalo, omunye wabaqondisi be Meikles Africa Limited uMnu. Onias Makamba utshele iStudio 7 ukuthi inkampani le isivumelane lohulumende ukuthi izathengisela izisebenzi amashares ayisilinganiso sokulitshumi ekhulwini.

Umnu. Makamba uthi lokhu kuzakwenza ukuthi iMeikles Africa Lmited ibe yinkampani ebanjwe yinzalo ye Zimbabwe ezabe isilamashares ayisilinganiso sokungamatshumi amahlanu lambili ekhulwini.

Uphinde wathi izisebenzi sezidinga imali yokuthenga amashares la akade ngoLwesithathu ayizigidi eziyisithupha zamadola eMelika.

XS
SM
MD
LG