amalinks wokungena

Breaking News

Isizalwane seZimbabwe Sidinga Ingwalo Zokuvuselela Ulimi LweSiNdebele


UMnu. Khulekani Ncube loMnu. Mlungisi Ndlovu babuka ingwalo ezidingwe nguNcube.

Ngesikhathi abantwana besikolo beqala izifundo zabo zalonyaka, oququzela ukuqakatheka kokubala ulimi lweSiNdebele lezamasiko, uMnumnzana Khulekeni Ncube, uthi useqoqe inqwaba yengwalo zeSiNdebele phansi komkankaso wakhe ohlose ukukhuthaza abadala labancane ukuthi bathande ukubala njalo bangalahlekelwa ngamasiko.

UNcube uzelwe eMatole ePlumtree wasefunda khona wayacina ngo Grade 7 eseswele imali yokuqhubekela phambili.

Yena-ke uthi lokhu yikho okwamenza wakhula elentshukuntshu yokukhankasela ukuphiwa kwethuba lezemfundo ikakhulu kulabo abantwana abaphuma emulini eziswelayo.

Uthi ngemva kokubona ukuthi ziyanyamalala izingwalo zesiNdebele, ikakhulu emazweni okugcwele khona izizalwane zeZimbabwe, wakhanda icebo elizenza lezi ingwalo zitholakale kuzo zonke izizalwane zeZimbabwe.

Waqalake ukuziqoqa zonke ezeSindebele ahlangana lazo, waze waba lenqwaba yazo. Ngemva kokukhulumisana labalobi balezingwalo kumbe amankampani aphiwe umsebenzi wokuzicindezela, umnumnzana Ncube uthi usesungule umkhankaso wokuthi zifinyelele umuntu wonke ozifunayo.

Uthi zimbili inhloso ezihamba phambili emkhankasweni wakhelo.

“Kwakunhlupha kakhulu ukutshabalala kwezingwalo zeSiNdebele ngoba kwakusitsho ukutshabalala komlandu wethu, ukutshabalala kwembali yethu. Ukuze sazi lapho esiyakhona kumele sazi lapho esisuka khona. Ukuwa komnotho kudale ukuthi ingwalo zingathengeki ngoba ziyabiza kakhulu. Ma usufika lapha usulinganisa amadola lamarandi zingabe zisathengeka kahle kwabanengi.”

Isizalwane seZimbabwe, uMnu. Mlungisi Ndlovu, utshayela uNcube izandla esithi umkhankaso wakhelo awusizi kuphela kwezemfundo kodwa wakha isizwe.

Ezinye ingwalo esezidingwe nguMnu. Khulekani Ncube ...
Ezinye ingwalo esezidingwe nguMnu. Khulekani Ncube ...

“ISiNdebele ngisithanda kakhulu sivuselela isizwe sakithi sibe zazi ukuthi singabantu ababuya kuphi siyakuphi. Ngiyabonga kakhulu ukuthi asilethele zona endaweni yaseGoli ngoba thina abanye kuba nzima ukuthi ma sifika ngale ezweni lokuzalwa sizithole. Umntanami ongumfana ngizambekela zona ukuthi ma ekhula azifunde azi ukuthi isizwe sakithi sibuya kuphi njalo siyaphi.”

Esinye njalo isizalwane seZimbabwe, uMnu. Fibion Khoza, uthi abazali yibo asebelomsebenzi omkhulu wokutholela abantwababo ingwalo lezi ukuze mhla besuka emhlabeni batshiye kulomhlahlandlela ocacileyo ebantwaneni babo.

“Ngiqale kudala ukufunda, akunamuhla. Ngokusilela kwazo kodwa ngithe nxa ngifika lapha eGoli ngahlangana loMathambo ngathola ukuthi uMathambo uyazithengisa. Ingwalo zona ngizithandela ukuvuselela ulimi lwakithi lweSindebele ngoba ungathi uyakhangela selutshabalele. Abanengi abasazilandeli kakhulu ingwalo.”

UNcube okwamanje ohlala eJohannesburg uthi isizwe yisizwe ngamasiko aso kanti kulezi insuku indlela elula yokufundisa intsha ngala masiko yikuloba phansi ukuze bazibalele.

Kodwa uthi asekunanzelele yikuthi selokhu kufike amatelevision, owhatsapp labo Facebook, umkhuba wokubala ingwalo zeSiNdebele ezifundisayo lokunotha ngamasiko uya ulokhu usehla.

Kulo umkhankaso uthi ufinyelela abadala labancane ukuze bathenge lezi ingwalo baqale ukuzigqaja ngolimi lwabo.

UNcube uthi lezi ingwalo zidingeka kakhulu emazweni afana leSouth Africa, eBotswana le UK lapho okulenengi lezizalwane zeZimbabwe, abadala labancane abangenelisiyo ukuzithola lezi ingwalo.

Udaba lwenkuthazo yokubala ingwalo zesiNdebele siluphiwa nguBenedict Nhlapho
please wait

No media source currently available

0:00 0:03:15 0:00

Facebook Forum

XS
SM
MD
LG