Uhulumende weZimbabwe uthi ulesikwelede esifika izigidi ezingamakhulu amane amadola, i$400 million - kubo manisipala bonke elizweni jikelele.
Ilizwe lilabo manisipala abafika phose abalikhulu - 92.
Lokhu kubikwa kubangela ukuthi omanisipala behluleke ukuqhuba imisebenzi yabo ngemfanelo.
Uzulu othwelenzima ngokuswelakala kwemali lesimsebenzi laye ulezikwelede zabomanisipala ezinengi kakhulu okwenza imisebenzi yabomanisipala efana lokutholisa uzulu amanzi ahlanzekileyo, imigwaqo engela magodi kanye lokulahlwa kwezibi kubenzima.
Sixoxe lokhansila wedolobho le Harare, uMnu. Peter Moyo, othi uhulumende nguye owenza kungabilula ukuthi umanisipala aqhube inhlelo zakhe.
"Njengoba likwazi ukuthi khona savela sakhuluma laphana kuthiwa sicitshe imali ezazikweledwa ngabantu, kwavela kwaqalisela khonaphana," kutsho uMoyo.
Siphinde saxoxa lengcwethi ecubungula ezombusazwe, uMnu. Rejoice Ngwenya, othi uhulumende nguye owehluleka ukuvuselela umnotho welizwe okubangela ukuthi abantu behluleke ukuhlawula imali kamanisipala.
"Vele into yakhona ibambene lomnotho welizwe. Sihlala sikhuluma nje ukuthi i-industry nxa ifile abantu abama industry yibo abajayele ukubhadala imithelo yama rates," kutsho uNgwenya.