amalinks wokungena

Breaking News

South Africa: Bazaphindiselwa Ekhaya AbeZimbabwe Abayi 2396


Umnumzana Malusi Gigaba umpathintambo wendaba zasekhaya kwele South Africa.

Ugatsha lwendaba zasekhaya kweleSouth Africa luthi luzaqhubekela phambili ngesinqumo salo sokubuyisela eZimbabwe bonke abalezicelo zokuthola amapermits ZSP ezingemukelwanga lobanje inengi lalabo bantu besithi bancitshwe amapermit la ngezizatho ezingayisizo zeqiniso. UMphathintambo wogatsha lwendaba zasekhaya kweleSouth Africa umnumnzana Malusi Gigaba uthi phakathi kwezicelo ezizinkulungwane ezingamatshumi ayisitshiyagalombili lantathu (83.009) esezihluzwe lugatsha lwakhe, kulabazinkulungwane ezimbili lamakhulu amathathu (2396) asebencitshwe amapermit eZSP.

Lobanje sekuvuke omkhulu umsindo ovela kuzizalwane zeZimbabwe esezincitshwe amapermit eZSP, Umphathintambo wogatsha lwendaba zasekhaya kwele South Africa umnumnzana Malusi Gigaba uthi lezo zinqumo ngeke zisaguqulwa.

Inengi lalabo abalezicelo zabo ezingemukelwanga batshele iStudio 7 ukuthi kabavumelani lezizatho zokuncitshwa kwabo amapermit zokuthi kababuyisanga incwadi zabaqatshi njengoba besazi mhlophe ukuthi bazibuyisa.

Lobakunjalo, umnumnzana Malusi Gigaba utshele intathelizindaba eMidrand lamhlanje ukuthi uhlelo lokupha izizalwane zaZimbabwe amapermit a ZSP luhamba kahle kakhulu njalo bakhangelele ukuthi kusiyaphela uNcwabakazi lonyaka wonke umuntu esephethe ipermit yakhe ngezandla, kantike uthi kakulakubuyela emuva ngenyathelo lokuphindisela ekhaya labo abancitshwe amapermit la.

Emizameni yokutshengisa abezindaba ukuthi loluhlelo lohamba butshelezi, umnumnzana Gigaba uqhubele ezinye izizalwane zeZimbabwe amapermit ezandleni.

Umnumnzana Patrick Moyo ngomunye wabaphiwe ipermit yakhe ngumnumnzana Gigaba.

Umnumnzana Prince Sibanda yena uthi ikusasa lakhe selikhanya ngemva kokuthola ipermit yakhe.

Umnunzana Gigaba ukhuthaze labo abangakathintani lenkampani yeVFS Global becela ilanga lokuyafaka izicelo zabo ukuthi benze lokhu ngokuphangisa umusa ungakavalwa.

KulabeZimbabwe abedlula inkulungwane ezingamakhulu amabili (208, 967) abafaka izicelo zokuthola amapermit eZSP. Kukhangelelwe ukuthi nxa la amapermit ephelelwa yisikhathi ngo 2017, abanini bawo baphindele ekhaya njengoba bengasoke baphiwa amanye.

XS
SM
MD
LG