amalinks wokungena

Breaking News

ISweden Ingqoba ele Switzerland Yangena Kuma Quarter Finals


Iqembu le Sweden ngemva kokunqoba

Iqembu elimela ilizwe le Sweden emdlalweni wenguqu selifinyelele esigabeni se quarter – final eyomncintiswano wezizwe zomhlaba, iWorld Cup, oqhutshelwa elizweni lase Russia kulezinsuku.

Iqembu le Sweden linqobe ele Switzerland nge 1 ka nya njalo lihlohlelwe ngu Emil Forsberg ngehlandla lesibili elomdlalo.

Limpumela itsho ukuba iqembu le Sweden selilinde ukungqikilana lelizanqoba phakathi kwele England lele Colombia namhla ebusuku kusigaba se semi – final.

Isigaba esilandelayo esomncintiswano siqala ngoLwesihlanu lapho iqembu le France elizadlala khona lele Uruguay ngehola lesine emini yantambama kuthi ebusuku ngehola lethoba minwe mbili kuzadlala iqembu le Brazil lele Belgium.

NgoMgqibelo emdlalweni wakuqala kuzadlala iqembu le Sweden lelizanqoba phakathi kwele England lele Colombia namhla ebusuku kuthi emdlalweni wesibili kuzadlala iqembu le Russia lele Croatia.

Imidlalo ye semi – final izakuba khona ngeviki ezayo ngoLwesibili lango Lwesithathu.

please wait

No media source currently available

0:00 0:04:33 0:00

Kumdlalo werugby iqembu elimela ilizwe le Zimbabwe emdlalweni we rugby lizithole selibhekane lodubo lokulala ezitaladeni zelizwe lase Tunisia lapho eliyedlala khona leqembu elimela ilizwe lakhonale ngemva kokuba lifakwe ehoteleni engacaciyo.

Iqembu le Zimbabwe likhethe ukuba kungcono ukuba lilale esitaladeni kulokuba lilale kulelo hotela njalo lokhu kuze ngemva kokuba like lalindiswa okwesikhathi eside ekufikeni kwalo elizweni le Tunisia kuthiwa likhokhe imali zama visa.

Umphathintambo wezemidlalo kwele Zimbabwe uKazembe Kazembe ukhiphe umbiko esithi akusumlandu wogatsha lwakhe ukunakekela iqembu leli kunhambo zalo kodwa kungumlandu welizwe le Tunisia ukuphatha kuhle izivakatshi zalo njengalokhu aba Zimbabwe abakwenza ngesikhathi abe Tunisia bevakatshele kuleli.

Olandela ezemidlalo uKathrine Dube uthi loba kuyabe kumele abelizwe elivakatshelwe ngamaqembu akwele Zimbabwe belinakekele kuyaziwa vele ukuba kulamazwe angaphathi kuhle izivakatshi njalo kumele abe Zimbabwe behlale bekulindele lokho.

Iqembu le Zimbabwe lele Tunisia aphatheke kumidlalo ye Africa Rugby Gold Cup okungumncintiswano owkudinga iqembu elizintshantshu zezwekazi lase Africa okuyilo njalo elizathola ilungelo lokuyaphatheka kumidlalo yezizwe zomhlaba ozaqhutshelwa kwele Japan ngomnyaka ozayo.

Iqembu le Zimbabwe lisendaweni yesine engalaneni yemiklomelo kuthi ele Tunisia lisendaweni yesithupha.

Facebook Forum

XS
SM
MD
LG