Iqembu lomdlalo wenguqu ele Triangle yilo eselihlezi phezu kwengalane yemiklomelo kusigaba se Premier Soccer League ngemva kwemidlalo yeviki lethoba munwe munye.
Iqembu le Triangle libhaxabule ele Whawha ngemiklomelo eyisithupha kungelampendulo ngeSonto lahle landiza layahlala phezu kwengalane lapho obekuhlezi khona iqembu le Chicken Inn phambilini kwemidlalo yangempalaviki.
Iqembu le Chicken Inn libe ngutshiki lobhanqa leqembu le ZPC Kariba ngoMgqibelo lalahla imiklomelo emibili okuyimpumela edale ukuba lihwithwe ngele Triangle loba nje womabili lawa maqembu elemiklomelo engamatshumi amabili kuthi ele Triangle lihlezi phezulu ngoba lihlohle kanengi.
Kundawo yesithathu kuhlezi iqembu le Dynamos lona elinqobe ele FC Platinum nge 1 ka nya ngeSonto njalo lilemiklomelo elitshumi lesikhombisa.
Iqembu le How Mine lihlezi kundawo yesine lilemiklomelo elitshumi lanhlanu okulinani elifana lelileqembu leChapungu elikundawo yesihlanu.
Kundawo yesithupha kuhlezi iqembu le Highlanders elilemiklomelo elitshumi lane njalo elibe ngutshiki lobhanqa leqembu le Harare City 1 ka 1 ngeSonto eMagumeni.
Iqembu le Harare City yilo elihlezi kundawo yesikhombisa lilemiklomelo elitshumi lantathu okulinani elilingana lelileqembu le Caps United.
Kundawo yethoba munwe munye kuleqembu le ZPC Kariba lona elilemiklomelo elitshumi lanye lona lilandelwa liqembu le FC Platinum elilemiklomelo elitshumi.
Iqembu le Hwange lona elenelise ukunqoba okwakuqala selokhu kuqale imidlalo yalonyaka lapho litshaya ele Flame Lily nge 2 ka nya lihlezi kundawo yetshumi lanye lilemiklomelo eyithoba munwe munye ndawonye leqembu le Buffaloes.
Kundawo ezine ezingaphansi kwengalane kuhlezi amaqembu angene lonyaka kusigaba se PSL athi ele Tsholotsho lele Whawha wona alemiklomelo eyithoba minwe mbili kanye le Flame Lily elemiklomelo eyisithupha kuthi iqembu elijeke amanye wonke ngele Dongo Sawmill elilemiklomelo emithathu.
***************************
Sikhangele imidlalo yenguqu edlalwe kwamanye amazwe ngempelaviki edluleyo;
Ngase Ngilandi imizamo yeqembu le Liverpool eyokuba ngelinye lamaqembu azaphatheka kumncintiswano we Uefa Champions League iphelele emoyeni njengezithukuthuku zenja ngemva kokuba leliqembu libe ngutshiki lobhanqa 1 ka 1 leqembu eliphakamise isicoco se ligi kulelolizwe ele Chelsea ngeSonto.
Limpumela itshiye iqembu le Liverpool lilemiklomelo engamatshumi ayisithupha lambili (62) ikanti iqembu elihlezi phezu kwalo engalaneni ele Manchester United lilemiklomelo engamatshumi ayisithupha lathoba minwe mbili (68) womabili lawa maqembu esalelwe yimidlalo emibili.
Lokhu kutsho ukuba amaqembu athi ele Chelsea, ele Machester City, ele Arsenal, kanye lele Manchester United yiwo azaphatheka kumidlalo ye Uefa Champions league kuthi iLiverpool lelinye phakathi kwe Tottenham Hotspur le Southampton azadlala kumncintiswano we Europa Cup.
Ngase Spain iqembu le Barcelona lithuthukise amathuba alo awokuphakamisa inkezo yeligi ngemva kokuba linqobe ele Real Sociedad nge 2 ka nya kwathi lelo elincintisana lalo ele Real Madrid laba ngutshiki lobhanqa 2 ka 2 lele Valencia.
Limpumela itshiye iqembu le Barcelona lilemiklomelo engamatshumi ayithoba munwe munye kuthi ele Real Madrid lilemiklomelo engamatshumi ayithoba minwe mbili lesithupha.
**********************
Sikhangele umdlalo we Golufu.
Iqembu labasakhulayo elimela ilizwe le Zimbabwe emdlaweni wegolufu liqede likundawo yesibili kumncintiswano we All Africa Junior Golf Challenge oqhutshelwe elizweni le Zambia ensukwini ezisanda kwedlula.
Iqembu le Zimbabwe belimelwe ngabadlali abathi u Jack Allard obenguye ukaputeni, uDavid Amm, uKieren Vincent kanye lo Bekithemba Ndlovu.
Iqembu elimela ilizwe le South Africa yilo eliqede likundawo yakuqala lile 874 points kuthi ele Zimbabwe lithole 929 points, ele Zambia eliqede lisendaweni yesithathu libele 936 points kuthi ele Kenya eliphutshe lisendaweni yesine libe le 962.
Ukuqeda likundawo yesibili kutholise iqembu le Zimbabwe ilungelo lokuyadlala kumncintiswano we Toyota World Junior Golf Team Championship ozaqhutshelwa elizweni le Japan ngenyanga kaNhlangula.