Inhlanganiso yeWomen of Zimbabwe Arise, iWOZA, itshengisele ngokungena ezitaladeni yaya emawofisini kaHulumende eMhlahlandlela ilezikhalazo ezimbalwa ezibalisa lezemfundo yakhuthaza uzulu ukuba ayeke ukubhadala imali yama fees besithi imali le engafika ku US$100m uyithatha athenge ngayo izikhali azisebenzisa ekuhlaselini njalo uZulu.
Abasakhulayo kunye labazali ngoLwesine bangene ezitaladeni bephethe amagwaliba alensolo zabo, kunye lamalungelo abo ayephulwa nguhulumende kwezemfundo.
Bebehlabelela behaya uhulumende bethi kusukela kuterm ezayo abayikuhlawula ilevy ngoba uhulumende wavuma ukuba abafundi bazofunda kungela mbadalo.
Omunye wabafundi uNontokozo Siwela ukhulume eseMhlahlandlela ngomthetho wamazwe omhlaba wezemfundo owasayinwa nguHulumende weZimbabwe ethi awulandelwe.
UBuhlebenkosi Tshuma laye usekele amazwi kaSiwela ethi uhulumende usethethe umlandu wokubafundisa kungelanhlawulo wawuphanyeka ebazalini.
UMfundisi Useni Sibanda laye ophatheke ekutshengiseleni kwalamhlanje ukhuthaze uHulumende ukuba alalele uZulu njalo kungehlula bayakuyatshengisela esigodlweni emzini wakhe.
UNkosikazi Magodonga Mahlangu ilunga leWOZA uchaze kabanzi ngemithetho eyasayinwa nguhulumende kwezemfundo kodwa angayilandeliyo wathi lokhu yikwephula amalungelo abafundi.
Amapholisa aqabuke abatshengiselayo sebesemawofisini eMhlahlandlela bazama ukwethusela kodwa uNkosikazi Mahlangu wabatshela ukuba kabesabi njalo usezababophisa ngoba usebazi ngoba bafole okusemthethweni njalo lesisekelo sombuso siyabavumela ukutshengisela.
Amapholisa azame ukufuqa kodwa abatshengiselayo bayala belokhe bemi ndawonye.
AbeWOZA bakhulume labatshengiselayo baze baqeda abakufunayo amapholisa asala engelankani sebehaladwa ngumkhokheli wabo ebadobhisa amabhakane lamaphepha atshiywe ngabatshengiselayo.
AbeWOZA banqume ukuba makungabi lomzali ohlawula imali yesikolo mhlazivulwa uHulumende aze enze umhlangano labazali aphawule ukuba bengasahlawuli imali yesikolo.
Bacele njalo ukuba uHulumende athuthukise imali yebudget yezikolo kanye lokuthuthukisa ezemfundo ezweni.
UNkosikazi Jenny Williams nguye ophe abalindayo amasango eMhlahlandlela iphepha lalpkho abafuna kwenziwe nguHulumende ngemva kokuba sebevale amasango ukuba bangene bayebona uSibalukhulu wedolobho lakoBulawayo uSandi Moyo.
