Inkokheli yenhlanganiso elwela amalungelo ezakhamizi eye Bulawayo Progressive Residents Association ibithe gwaqa emhlanganweni omkhulu we general council meeting edolobheni lakoBulawayo ngeSonto, icubungula okuhluphayo kulelidolobho.
Umgcinisihlalo walinhlanganiso uMnu. Ambrose Sibindi uthi kulumhlangano bekulenkokheli emele ama ward wonke angamatshumi amabili lesitshiyagalolunye-29 akulelidolobho.
Kuhlaziywe okuphathelane lokuswelakala kwamanzi, amagetsi, indlela uhulumende aba ngayo ukudla, kanye lokusebenza kwekhansili yakulelidolobho.
Kusenjalo, isiphathamandla senhlanganiso yeAmalgamated Rural Teachers Union of Zimbabwe uMnu. Discent Bajila uthi ababalisi abafundisa emaphandleni basola ukubotshwa kwabanye babo eHarare ngoLwesihlanu betshengisela besola iholo eliphansi.
Uthi umnotho welizwe ulokhu uthwalise abantu amagabha avuzayo njalo lanxa uhulumende esithi uzakhuphula iholo lezisebenzi zakhe, intengo yempahla layo izaqonga.