Izakhamizi zakoBulawayo zithi seziqoqe ukutshengisela ngokufola okulokuthula kulelidolobho zisola uhlelo lukahulumende olokuthi amakhansili wonke elizweni aqhubeke ngohlelo lwama water pre-paid meters ngoba besithi abalamali yokubhadalela amanzi bengakawasebenzisi ngenxa yokuba lukhuni komnotho welizwe.
Ukufola lokhu kubizwa ngokuthi “Anti Water Prepaid Meters March” njalo kuzakwenziwa ngoLwesihlanu oluzayo. Kukhangelelwe ukuthi inhlangnaiso ezizimeleyo kanye zizaphathisa kulokhu ukufola.
Inhlanganiso ye Bulawayo Progressive Residents Association ngenye yenhlanganiso eziqoqe lokhu ukutshengisela. Unobhala jikelele walinhlanganiso uMnu. Ambrose Sibindi uthi akufanelanga ukuthi uhulumende asungule loluhlelo ngesikhathi amafekithali evalwa kulelidolobho labantu bengelamisebenzi.
