Izakhamizi zeKezi zithi ziphiwa irayisi ebolileyo nguhulumende encedisana lebandla leZanu PF esigulise abanye abantu esiqintinti seMatobo esabelweni seMatabeleland South.
Inhlanganiso elwela amalungelo abantu iZimbabwe Human Rights Commission icine ingenela ikhuza uhulumende kwaba nganeno kodwa kwezinye izigaba zendawo le abantu lokhe bebandlululwa ngokuthi basekela liphi ibandla lombusazwe.
UNkosikazi Lindiwe Mabhena uthe bayabandlululwa ekuphiweni ukudla okunjenge rayisi eyabelwa abe ZANU-PF. Uthe irayisi le ebolileyo isigulise abantu abanengi.
UMnunzana Mcedisi Mavuso Tshabalala, isakhamuzi seTshelanyemba, uvumelane loNkosikazi Mabhena esithi kulenkethabetshabi ekwabelweni lirayisi.
UMnunzana Bongani Mpofu laye uthe kulerayisi eyayisendaweni ebizwa ngokuthi yiMabonyane lapho abacina beyithengiselwa.
UNkosikazi Queen Nyoni ugcizelele esithi irayisi le isidale ukulwa phakathi kwabantu abasesigabeni esilendlala.
Abantu asebekhulile bona abagcine intandane bathi bayangcitshwa lokho kudla okuyinto ebadanisayo.
UNkosikazi Mollina Sibanda owezempilakahle eMahetshe uthe kuyadanisa ukuthi irayisi ibolile njalo iyagulisa inengi sikhuluma kanje lisezibhedlela.
Ilizwe libhekane lezulu elinengi kuthi iMatebeleland yonke ihlaselwe yizikhukhula izilimo zahamba lamanzi.
UMongameli Robert Mugabe laye usethe izikhukhula lezi zibeyingozi okuzabangela ukuthi aqale ukutholisa uzulu ukudla nomanje ezinye izigaba zelizwe zizavuna. Izulu liqhubeka lisina abanye abalimi sebeqalile ukulima bethemba ukuthi bazavuna.
