Abahlali bakoBulawayo bathi bafisa ukuthi ikhansili yalelidolobho ifake izibholane emalokitshini angelazo, njalo uhulumende akhe amadamu, ngenjongo yokuqeda ukusilela kwamanzi.
Lokhu kwenzakala ikhansili yakoBulawayo isiqoqe umhlangano wesiphangi-phangi ngoLwesithathu kuyonale iviki, ukucubungula loludaba ngoba isithi ukusilela kwamanzi emadamu sokusezingeni elibi.
Izakhamizi zicitshelwa amanzi okwamalanga amabili, andubana avulwe, kodwa zithi ikhansili ayilandeli ngemfanelo uhlelo lwayo.
Isikhulumeli sekhansili yakoBulawayo uNkosikazi Nesisa Mpofu ubikwa esithi ukuswelakala kwamafutha ezimota elizweni kwenqabela umanisipala ukuthi athumele amatanka amanzi-awama bowsers, emalokitshini ayabe engelawo.
Umgcinisihlalo wenhlanganiso elondoloza amalungelo ezakhamizi eyeBulawayo Progressive Residents Association uMnu. Ambrose Sibindi uthi kunengi okungenziwa kusamelelwe uhlelo lweMatabeleland Zambezi Water Project..
