amalinks wokungena

Breaking News

I-Zanu PF Inqoba KumaBy-elections akoBulawayo


Zanu PF Logo

Ibandla leZanu PF linqobile kukhetho lwangoLwesithathu koBulawayo okwakuqala ngemva kweminyaka elitshumi lanhlanu lanxa nje livotelwe yingcosana nje yabantu – phezudlwana nje kwetshumi ekhulwini, 11.5% yalabo ababhalise ukuvota endaweni ezinhlanu ebezilokhetho lwama By-elections.

Inani labantu eliphume layavota koBulawayo libikwa lingaphansi kwenkulungwane ezilitshumi lanhlanu – 15 000 phakathi kwabantu abangaphezu kwekhulu lenkulungwane – 100 000 elikuluhlu logwalo lwabavotayo – ivoters’ roll.

Othole amavoti amanengi ngowayekubutho uMnumzana Tshinga Dube onqobe eMakokoba ngamavoti aphezu kwenkulungwane ezintathu – 3 182 elandelwa ngobezimele yedwa uMnumzana Sibangilizwe Msipa othole amavoti angu 473.

EPumula, uMnumzana Godfrey Malaba unqobe ngamavoti phose inkulungwane ezimbili lengxenye – 2 477, eLuveve uMnumzana Thandlolwenkosi Mlilo uthole amavoti angaphezu kwenkulungwane eyodwa lengxenye – 1 765 kwathi e Lobengula, uNkosikazi Maidei Mpala wanqoba ngamavoti phose inkulungwane ezimbili – 1 976.

Bobathathu laba bebelandelwa ngamalunga awebandla le Zapu lona ebelithola amavoti angaphansi kwenkulungwane ngandawo yinye - 777 ePumula, 562 eLuveve le 492 eLobengula.

EMpopoma-Pelandaba, uMnumzana Joseph Tshuma unqobe ngemva kokuthola amavoti aphezu kwenkulungwane ezimbili – 2 050.

Umgcinisihlalo weMovement for Democratic Change Renewal Team, owayengummeli weLobengula edale lephalamende, uMnumzana Samuel Sipepa Nkomo utshele intathelizindaba lamhla ukuthi abazwisisi ukuthi kungani uMnumzana Morgan Tsvangirai wabakhipha edale lephalamende engazimiselanga ukungena kukhetho. Uthi labo abakunanzelelanga ukuthi loludaba luzahlupha aluba bahle bamhambela phambili emthethwandaba bengakaxotshwa ukuze baqhubeke bemele uzulu owabakhethayo.

Inani labantu elivotileyo, uthi liveza ukuthi labo abangathandi ibandla leZanu PF abazihluphanga ukuyavota abayibo asebehlose ukukhulumisana labo kusiya fika umnyaka ka2018.

Isikhulumi sebandla leli koBulawayo, uMnumzana Edwin Ndlovu, njalo ehlala ePumula, uthi lolukhetho kumele lube yisifundo kumabandla aphikisayo ukuthi lapho exabana angakhohlwa ukuthi injongo yawo enkulu ngeyokuguqula umbuso webandla leZanu PF.

Ukuxabana kwamabandla la kanye lokungacuphelani ngitsho isawudo, uthi yikho osokwenze ibandla leZanu PF lathola inxeba lokungena ngalo koBulawayo okuzabanzima ukulikhupha.

UNkosazana Rita Mushava, uhlala emzini we Luveve. Uthi lonyaka inkomo imzele umuntu koMhlamhlandlela ngoba ubengakholwa ukuthi uzabakhona umnyaka lapho iBulawayo ezakuba labammeli bebandla leZanu PF.

Uthi inani lamavoti atholwe libandla leli akavezi ukuthi abantu abanengi sebelithanda lelibandla kodwa ukuthi yilabo abavele bethanda ibandla leli abaphume bayavota.

Kodwa kungaze kube libandla leZanu PF kumbe eliphikisayo, uthi umehluko uvele awukho ngoba ayikho intuthuko amabandla la angathi ayiletha kulelidolobho, kungaze kube yiyo iMDC –T ebinqoba kuminyaka yonke elitshumi lanhlanu edluleyo.

Kusenjalo usikhwicamfundo Jonathan Moyo unqobile eTsholotsho North ngamavoti aphezu kwetshumi lenkulungwane – 11 695, ancintisana labo uMnumzana Busani Ncube wathola amavoti angaphansi kwekhulu -91, kwathi uNkosikazi Getrude Sibanda wathola amatshumi amathathu lesitshiyagalombili kuphela – i38.

XS
SM
MD
LG