Inhlanganiso ebona ngokwethekelelwa kwelizwe eye Zimbabwe Tourism Authority (ZTA) ithi kube lezethekeli ezinengi okwamagama ezivela kwamanye amazwe ezibone ubuhle bemvelo eZimbabwe ngomnyaka ophelileyo njalo kukhangelelwe ukuthi inani labantu abazethekelela lezondawo liqonge lonyaka.
Umbiko owethulwe yi ZTA uthi ukwethekelela indawo zemvelo kuthuthuke ngesilinganiso sokuthathu ekhulwini nxa kuqathaniswa lanyakenye lapho okutholwe imali phose izigidi ezingamakhulu amathathu amadollar eMelika.
Inhlanganiso le ithi ukuqonga kwenani lezethekeli kubangelwe yikubunjwa kukahulumende womanyano olethe ukuthula kancane eZimbabwe.
Inguquko yokuqonga kwenani lezethekeli le iza ngemva kweminyaka elitshumi leli nani lisehla okwesabekayo kudalwe ngumbuso webandla le Zanu PF lapho liqalisa ukuthathela abamhlophe amapulazi.
Ele Zimbabwe liziqenya ngokuba lendawo ezinhle ezithandwa ngabantu bemazweni ezinjenge Victoria Falls, Great Zimbabwe, Matobo Hills, Hwange National Park, Mana Pools kanye lezinye.
Umnu. Zifiso Masiye ingcwethi ecubungula ezokwethekelela ezemvelo utshele uGibbs Dube we Studio 7 ukuthi inotho yelizwe ilakho ukuthuthukiswa ngabemazweni abethekelela ilizwe nxa kungaba lohulumende ohloniphekayo eZimbabwe.
