Izifundi ezingamatshumi amahlanu lambili - 52 zezikolo ezibalisa ese Waddilove le Goromonzi High School esigabeni se Mashonaland East zibikwa zihlolwe zatholakala zileCOVID-19 okuhle kwabangela ukuvalwa kwazo izikolo lezi zombili.
Izifundi ezingamatshumi amabili lane - 24 zasesikholweni seWaddilove zibikwa zitholakale zileCOVID-19 ngoMvulo, osokukhuphule inani lasebetholakele belegcikwane leli lokhu izikolo zavulwayo ngoMpandula selikumatshumi amane - 40.
Abalitshumi lambili batholakale belegcikwane leli esikolweni seGoromonzi High School ngemva kokuhlolwa kwezifundi ezingamatshumi amathathu lasikhombisa - 37.
Lezi zinombolo ezivezwa ngabequla elibona ngezokuvikelwa kokumemetheka kwalomkhuhlane esigabeni seMashonaland East embikweni wabo abawethula nsuku zonke, owe COVID-19 Daily Updates.
Abazi ngokwenzakala kulezi zikolo bathi ngempela kuliqiniso ukuthi izikolo zombili sezibhekane lodubo lokuhlaselwa yiCOVID-19 lanxa abaphathisikolo besala ukukhuluma labezindaba.
Abazali lezihlobo zabantwana abafunda kulezi zikolo bazonde baganu’nwabu besithi kungani iziphathamandla kulezi zikolo zingazange zabazisa isikhathi sisesekhona ukuze kuthathwe amanyathelo.
Umnumzana Melusi Banda olesihlobo esifunda eWaddilove High School uveze ukukhathazeka okukhulu ngale mibiko.
“Uhulumende ngabe uyasilalela thina abazali njengoba kungabantwabethu laba asebebanjwa yiCorona ezikolo. Savela satsho thina ukuthi zingavulwa lezo zikolo kungakabi lamalungiselelo wokuvikela umkhuhlane okunje ngama sanitisers lama Mask, into ezinjalo. Kodwa inani lakhona vele selikhuphukile njengento vele esasiyazi ukuthi izokwenzakala but uGovernment wethu lowo wenza okwakhe. Khathesi uthi yena kasoze avale lezo zikolo, utsho ukuthi ulendaba lemali kuphela, vele kalandaba. Lento iyasixaka kakhulu, ibuhlungu khithi thina njengabazali. ”
Isikhulumeli senhlanganiso yomanyano wezisebenzisana lozulu eye Crisis in Zimbabwe Coalition umnumzana Marvelous Khumalo uthi hulumende wavele wenza iphutha lapho evumela ukuvulwa kwezikolo engela ndlela zokuvikela izifundi, ababalisi labazali.
“Impilo yabo isengozini. Uhulumende kufuze, izikolo khathesi zivalwe, kusale labo ababhala ama examinations kuphela ukuze engafaki impilo yabantwana engozini. Bonke laba abangabhaliyo ama Exams kufuze baphenduke emakhaya, kusale labo ababhala ama Exams abo kuphela.”
Abenhlanganiso yababalisi eye Amalgamated Rural Teachers Union-ARTUZ bathi lokhu osekusenzakala yikho kanye ababekuxwayisa uhulumende ngakho izikolo zivulwa kodwa wangalaleli.
Unobhala esigabeni seMatebeleland South kuARTUZ unkosikazi Melissa Chingwangwana ulandisa kabanzi ngalokho.
“Izikolo ezinengi azenelisi ukuthola lokho okuthiwa ngamaPPE’s avikela kugciwane leCOVID-19. Siyathemba ukuthi ngemva kokubona lokhu, izikolo zizavalwa kusenzela ukuthi inani leli lingabi lokhe lingezelela, likhula. ”
Umphathintambo wezemfundo yePrimary le Secondary umnumzana Cain Mathema utshele intathelizindaba ukuba akazi lutho ngezikolo esezithe zavalwa ngenxa yodubo lokuhlaselwa ngumkhuhlane we COVID-19.
U Mathema utsho lokhu izolo kusihlwa, emhlanganweni lentathelizindaba ovame ukwenziwa ngemva kokuhlangana kwedale labampathinambo eleCabinet.
“Sikhangela isikolo sinye ngasinye, kusiya ngokuthi kuyini okwenzakala kizo. Kodwa bonke labo okumele babhale imihloliso yabo, bazoyibhala kungekho nkinga. Asila sikolo esesithe savalwa ngenxa yeCOVID-19. ”
Emhlanganaweni munye umphathintambo wezokwethulwa kwemibiko uNkosikazi Monica Mutsvangwa uthe uhulumende ukhathazekile ngezehlakalo zokuhlaselwa ngumkhuhlane weCOVID-19 kwezifundi njalo ezokwenza konke okusemandleni akhe ukukwenqabela lokho.
Lanxa uhulumende elokhu engavumi ukuthi kule zikolo esezivaliwe ngemva kokuhlaselwa yiCovid 19, lokhu likhula uluhlu lwezikolo esezithe zahlaselwa yileli gcikwane leCovid 19.
Ngaphandle kweGoromonzi le Waddilove izolo iStudio 7 ibike ngesikolo seMtshabezi esisesigabeni seMatebeleland South. Kuthi ngeviki ephelileyo bekubabazwa isikolo seJohn Tallach, iMatopo High, Chinhoyi lezinye.
