Inhlanganiso yabafundi eye Zimbabwe National Students Union (ZINASU) ithi ikhangelele ukuthi izifundi ezingaba yinkulungwane lamakhulu amathathu zizaphathisa ehlelweni lokuloba kutsha isisekelo sombuso welizwe.
Umnumzana Mfundo Mlilo isikhulumeli senhlanganiso le ekhokhelwa nguMnu. Joshua Chinyere utshele uGibbs Dube we Studio 7 ukuthi abafundi abalikhulu sebekhethiwe ukuthi bangene enzikini yaloluhlelo ukwenzela ukuthi isisekelo sombuso esitsha sinanze amalungelo abafundi.
U Mlilo uthe amalungelo ezifundi kawakho kusisekelo sombuso welizwe esalotshwa ngo 1979 eLancaster House kwele Bhilithani kusenzelwa ukuthi abalwa impi yenkululeko ngaleso sikhathi babeke phansi izikhali kube lozibuse opheleleyo elizweni, abensundu banikwe ilungelo lokuzikhethela inkokheli.
Uphinde wathi njengoba amalungelo ezifundi engekho kulesisisekelo sombuso, uhulumende ubesenza santando kwezemfundo eminyakeni yonke le, okubangele ukuthi abanye abantwana behluleke ukuya emakolitshini emfundo yaphezulu lezikolweni.
