Izibhedlela ze United Bulawayo Hospitals (UBH) zibikwa sezimise ukuhlinza izigulane, ama operation ngesilungu, kulandela ukusilela kwemithi yokulalisa izigulane.
Encwadini ethunyelwe odokotela bezibhedlela lezi umqondisi wezempilakahle kugatsha lwezemilakahle, uDokotela NBT Dzvanga uthe ukusilela kwemithi le asiko koBulawayo kuphela kodwa ilizwe lonke jikelele.
Ngenyanga edluleyo izibhedlela zeHarare yizo ezihlaselwe ludubo lolu lakathesi lokhe lukhona lanxa kubikwa kuyake kube nganeno kwamanye amalanga okokuthi abantu bayake bahlinzwe.
Ukusilela kwemithi le kutsho ukuthi umuntu ofuna ukuhlinzwa ngenxa yomkhuhlane kumbe amanxeba angafaki engozini kasoze ahlinzwe kodwa abantu abalezifo ezifaka impilo yabo engozini, abafana labazithweleyo labayabe bewelwe zingozi ezifana lezemota ,bayelatshwa ngengcosana yemithi yonale eseleyo.
Omela isigaba se Bulawayo East edale lephalamende, esibalisa izibhedlela zeUBH, uNkosazana Thabitha Khumalo owebandla le MDC-T, uthe umumo usumubi kakhulu ezibhedlela.
"Sekuhlatshwa umkhosi namhlanje ngokuthi akusela mithi yokuhlinza abantu. Umnyaka uqalisa abantu bengahambisa izihlobo zabo esibhedlela bekuthiwa bayethenga imithi, bayethenga ama drip, bayethenga ama injection bathula abantu bathi zwi," kutsho uKhumalo.
