Izikolo zivuliwe ngoLwesibili abazali besithi abenelisi ukuthenga izigqoko zabantwana zesikolo, amabhuku, kanye lokubabhadala imali yama school fees ngenxa yokuswelakala kwemali.
Ngakwelinye icele, ababalisi bathi bafuna ukwengezelelwa iholo kumbe ukuhlawulwa ngemali yedola leMelika. Kodwa uhulumende uthi kufanele bebekezele ngoba usalungisa umnotho welizwe.
Ibandla leMDC lethule umbiko ngoLwesibili lichothoza uhulumende ngokwehluleka ukulungisa umnotho welizwe osokubangele ukuthi abanye abantwana bengenelisi ukuya ezikolo, kuthi lempilo yababalisi ibe lukhuni.
Sixoxe loMnu. Discent Bajila, isiphathamandla senhlanganiso elwela amalungelo ababalisi abafundisa emaphandleni eye Amalgamated Rural Teachers Union of Zimbabwe, yena ochasisa ukuthi amatitshala angamalunga alinhlanganiso akhona ezikolo kodwa awafundisi, ngendlela yokubamba uhulumende ngamandla ukuthi alalele izikhalazo zawo.
