amalinks wokungena

Breaking News

IZimbabwe Ingqikilana leNamibia Emdlalweni weRugby


Iqembu le Zimbabwe kumele linqobe ele Namibia ngoMgqibelo ukuze liyale lilokhu lilethuba elokuyadlala kumncintiswano wezizwe zomhlaba ngomnyaka ozayo elizweni lase Japan.

Abafana be Zimbabwe sebedlale imidlalo emithathu kulumkhankaso njalo emdlalweni wakuqala libe ngutshiki lobhanqa 23 ka 23 lele Morocco kwathi kowesibili litshaywe nge 45 ka 36 ngele Kenya ikanti kowesithathu lidliwe nge 18 ka 14 ngele Tunisia.

Limpumela itshiye iqembu le Zimbabwe lisendaweni yesine engalaneni yemiklomelo kodwa umdlali waleliqembu uTapfuma Parirenyatwa uthi bona njengabadlali balethemba elokuba bazafinyelela ukuyadlala kumidlalo yezizwe zomhlaba.

Kumidlalo esiyidlale phambilini kwalo owangempelaviki sidlale kuhle kakhulu okokuthi bekungela mehluko omkhulu phakathi kwethu lamaqembu ebesidlala lawo njalo sinqotshwe sekusele imizuzu emihlanu ukuba umdlalo uphele.
Okuqakathekileyo yikuba siyakholwa ukuba sizaphumelela njalo ukukholwa yikho okumqoka ukuze sifeze izifiso zethu.

Amanye amaqembu aphatheke kumkhankaso wokudinga iqembu elizakuyadlala kumncintiswano wezizwe zomhlaba ngabalisa ele Kenya, ele Tunisia, ele Morocco kanye lele Uganda njalo iqembu elizaphutsha imidlalo liphezu kwengalane yilo elizaphakamisa isicoco se Rugby Africa Gold Cup liphinde lithole ilungelo elokuyadlala kumncintiswano wezizwe zomhlaba.

Iqembu elizaphutsha lisendaweni yesibili engalaneni yemiklomelo lizadlala lamanye ayabe ephutshe esendaweni efanayo kwamanye amazwekazi kuthi elizanqoba lapho lalo lizakuyadlala kumncintiswano wezizwe zomhlaba.

Kusenjalo, akulamidlalo yenguqu eyesigaba seCastle Premier Soccer League kanye leye Southern Region Division One kulimpelaviki edolobheni lako Bulawayo njengoba inkokheli ye Premier Soccer League idlulisele phambili imidlalo yeviki lamatshumi amabili lanye ngoba kusesatshelwa ukuba kungaba lodlakela ngemva kokungazwanani phezu kwempumela yokhetho oluqhutshwe ngempelaviki eyedluleyo elizweni.

Abathanda ezemidlalo balakho ukuyazilibazisa bebukele umncintiswano we Zimbabwe Squash Open oqale namhla endaweni ye Suburbs Squash Club njalo ozafika emaphethelweni ngeSonto.

Lumncintiswano ungenwe ngabadlali bakwamanye amazwe agoqela ele South Africa, Zambia kanye le Nigeria.

NgeSonto umncintiswano kakhilikithi owe Spar Bonsa Twenty20 uqhubekela phambili enkundleni ye Heath Streak Cricket Academy lapho amaqembu azadlala ngokulandelayo; iqembu le Badgers lizadlala lele Sabres, ele Raptors lizadlala lele Hawks kuthi ele Blazers lizadibana lele Tigers.

please wait

No media source currently available

0:00 0:02:43 0:00

Facebook Forum

XS
SM
MD
LG