Iziphathamandla zakwele South Africa seziqalisile ukungena emankampanini zidinga abokuza abangela maphepha okuhlala kulelolizwe kulandela udlakela oluqondiswe kwabokuza oluqhamuke kumalanga ambalwa adluleyo.
Ezinye izizalwane zakwele South Africa zithi sezikhathele ngabokuza asebethethe imisebenzi, abafazi babo baphinda bangena kunhlelo zokuphathisa abaswelayo balelo lizwe bona bedabuka kwamanye amazwe.
Kodwa abokuza bona bethesa izizalwane zakwele South Africa icala lokungafuni imisebenzi engela holo elikhulu.
NgoLwesibili, izizalwane zeZimbabwe lezinye ezivela kwamanye amazwe zihlangane lomeya wedolobho le Johannesburg, uMnu. Herman Mashaba, ngenjongo yokuxazulula loludaba kodwa umeya wala elokhu esithi abokuza abangela maphepha kababuyele kibo.
Lanxa bekuke kwabalencwadi kwesinye isikolo ebizisithi abantwana abangela maphepha labo bazaxotshwa, uMnu. Ngqabutho Nicholas Mabhena, owenhlanganiso ye Zimbabwe Community in South Africa, utshele iStudio 7 ukuthi emhlanganweni abewenze izolo lomphathintambo wezekhaya kwele South Africa, uMnu. Malusi Gigaba, uthe lelinyathelo kaliseyikuthathwa.
"Yebo siyakhumbula ukuba ngeviki edluleyo izisebenzi zikahulumende ezogatsha lwe immigration, zingene ezitolo ze Spar zidinga abangela maphepha kwabotshwa abanye," kutsho uMabhena.
