Uskomtshi wamapholisa uMnu Augustine Chihuri, iziphathamandla zebutho, amalunga amathathu edale le cabinet labo sibalukhulu bezabelo babikwa bathatha imvundiso ye fertilizer enengi okwamagama eGrain Marketing Board (GMB) lonyaka ngesikhathi sokulima okwenza ukuthi kubelokusilela kwemvundiso ye ammounium nitrate.
Abakudale leCabinet abathatha imvundiso enengi nguMnu. Didymus Mutasa osebenzela ewofisini kaMongameli Robert Mugabe, umphathintambo wezokuthuthukisa inotho kazulu uMnu. Saviour Kasukuwere, umphathintambo wezokulima uMnu. Joseph Made njalo losibalukhulu wesabelo seMashonaland West uMnu. Faber Chidarikire.
Abanye abakungwalo ezijulileyo ze GMB ezihanjiswe kukhomithi yephalamende yezokulima ngu Brigadier General Herbert Chingono, uMnu. Mishrod Guvamombe ongumantshi lowayephethe isabelo se Mashonaland West uMnu. Nelson Samkange labanye abalezikhundla eziphezulu kubandla le Zanu-PF.
UChihuri ubikwa wathatha ifertlizer eyisisindo sokungamatshumi ayisitshiyangalombili – 80 tonnes, uMnu. Chidarikire angamatshumi ayisithupha, uMnu. Kasukuwere edlula amatshumi amabili-24, uMnu. Samkange edlula amatshumi amane-41tonnes kuthi-ke uBrigadier General Chingono laye edlula amatshumi amabili-21 tonnes.
Kusacubugulwa ukuthi uMade loMutasa bathatha imvundiso enganani. IStudio 7 kayesenelisanga ukukhuluma leziphathamandla lezi ngodaba lolu.
Umnu. Moses Jiri okukhomithi yephalamende ebona ngezokulima uthi basanda kuthola ingwalo lezi abalokhe bezihlolisisa ezilamagama abantu bonke abanikwa inhlanyelo lemvundiso ye fertlizer lonyaka yi GMB.
Umnu. Seiso Moyo umphathintambo kahulumende obona ngezokulima uthi ikhomithi ehlolisisa udaba lolu kumele yenze umsebenzi ohloniphekayo.
Iziphathamandla zeZanu-PF Lenkhokheli Yebutho Lamapholisa Bathatha iFertilizer Enengi eGMB
- Gibbs Dube
