Abaqondisi bengatsha zikahulumende ezibona ngezokuthuthukisa inotho kazulu lezemigodi babikwa beqhube umhlangano ngolweSibili e-Harare bebonisana ngokuthi kuthathwe nyathelo bani ngenkampani ye Impala Platinum yakwele South Africa engafuni ukwabela uzulu amashares afunakalayo phansi komthetho weIndigenization.
Umnu. Psychology Maziwisa ongumcebisi wezemithetho kugatsha lokuthuthukisa inotho kazulu utshele iStudio 7 ukuthi uMnu. George Magosvogwe loMnu. Prince Mupazvirihwo bahlafune okunengi ngenkampani le njalo sebekhangelelwe ukuthi bakhulumisane labaphathintambo bengatsha lezi ngokwabiwa kwamashares eImplats akunkampani ye Zimbabwe Platinum Holdings.
UMaziwisa uthi uMnu. Saviour Kasukuwere loMnu. Obert Mpofu bazakwethulela uzulu ngoLwesithathu ukuthi sebethethe sinqumo bani ngokwabiwa kwamashares eImpala Platinum.
Inkampani le yehlulekile ukuvumelana lohulumende ngokwabela amashares ayo uzulu loba nje isitshengise ukuthi amashares ayisilinganiso sokuhlanu ekhulwini-5% iwabekele izisebenzi lesikhwama sikahulumende ese Sovereign Fund.
Amanye njalo ayisilinganiso sokulitshumi ekhulwini-10% ithi azakwabelwa abantu abahlala duzane lemigodi ye Zimplats.
Kodwa-ke uMnu. Gift Chimanikire umsekeli womphathintambo wogatsha lwezemigodi uthi okwenziwa nguMnu. Kasukuwere akuhambelani lemithetho yelizwe.
Okungamazwi agcizelelwa nguMnumzana Rejoice Ngwenya ingcwethi kwezenotho othi ukulwisana lamankampani ezemigodi kubisela muva ukuthuthukisa inotho yeZimbabwe.
