amalinks wokungena

Breaking News

Iziphepheli zeZimbabwe KweleBotswana Zibhekana Lenhlupho


Iziphepheli enkmbeni yeDukwi Refugee Camp kwele Botswana

Iziphepheli zeZimbabwe enkambeni yeDukwi kweleBotswana zibhekane lekusasa elimnyama ngemva kokuba uhlangothi lwenhlanganiso yomanyano wamazwe womhlaba olubona ngeziphepheli olwe United Nations High Commission for Refugees lubike ukuthi soluzakwehlisa usizo elunika linkamba.

Uhlangothi olubona ngeziphepheli enhlanganisweni yomanyano wamazwe womhlaba olwe United Nations High Commission for Refugees luthi soluzakwehlisa usizo elupha inkamba yeDukwi ese Francistown kweleBotswana. Inkamba le ileziphepheli eziphose zibe ngamakhulu ayisikhombisa ezeZimbabwe.

Isikhulumi seUNHCR unkosazana Tina Ghelli uthi ayisilo qiniso ukuthi sebezavala inkamba le, kodwa bazakwehlisa uncedo lwabo ngoba belesiqiniseko sokuthi iBotswana ingenelisa inswelo zeziphepheli.

Kodwa omunye owethekelele enkambeni yeDukwi, umnunzana Shingirai Madondo uthi isimo asisihle, kukhomba iziphepheli ezibulawa yindlala, kukanti ezinye seziqale ukucela ukuphindela ekhaya.

Kusenjalo, izizalwane zeBotswana ziyakhonona kakubi ngokubangisana ukuthola amakhastoma ngoba iziphepheli sezithengisa ukudla kanye leyinye imphahla eziyithola kuUNHCR.

Emhlanganweni owenziwe lomphathintambo obona ngezomvikela kweleBotswana, umnunzana Shaw Kgathi, izizalwane lezi, zikhala ngokuthi, ngendlela lesi simo esiqhubeka ngayo bazaphuma kubhizimusi. Bethi ngoba iziphepheli zithengisa okufana lomuthi wokuxhubha, amafutha okupheka kanye lempumphu ngentengo ephansi kakhulu.

Omunye ongene lumhlangano, umnunzana Lebogang Mosikare utshele iStudio 7 ukuthi iziphepheli, noma zingavunyelwa ukuba lamavinkili amancane –amatuckshop, bona batholakala bethingisa.

Omunye weziphepheli ezisenkambeni yeDukwi Refugee Camp
Omunye weziphepheli ezisenkambeni yeDukwi Refugee Camp

Umphathinambo Kgathi yena uthi akuvunyelwa ukuthi iziphepheli zibe lamavinkili amancane ngoba sezincintisana lezizalwane zeBotswana.

Inengi leZimbabwe libikwa selitshengise isifiso sokuphindela ekhaya ngoba kungasakhwabitheki enkambeni le yeDukwi. Kodwa uGhelli uthi abafuna ukubuyela kungenxa yesimo sezombusazwe esiguquke sabangcono eZimbabwe.

XS
SM
MD
LG