amalinks wokungena

Breaking News

Iziphepheli zeZimbabwe Ezise Dukwi Refugee Camp eBotswana Azibuyeli Ekhaya


Abanye abantu abahlana eDukwi Refugee Camp eBotswana.
Abanye abantu abahlana eDukwi Refugee Camp eBotswana.

Isikhulumi seziphepheli zeZimbabwe ezisenkambeni yeDukwi kweleBotswana, uMnu. Bekimpilo Weza, uthi akusilo qiniso ukuthi iziphepheli ezidlula amakhulu angamatshumi amathathu zizaphindela ekhaya kuyonale inyanga.

Lokhe kuleziphepheli zeZimbabwe ezedlula amakhulu ayisithupha enkambeni yeDukwi phandle kwedolobho leFrancistown kwele Botswana. Kulehlekana nje eseluphindele ekhaya.

UWeza uthi ayisilo qiniso ukuthi abedlula amakhulu amathathu bekumele bephindele ekhaya ngoZibandlela.

"Ngikulandula lokho, abantu lokhe bekhona. Into zokubuyela ekhaya azihlelekanga kahle, uhulumende uyakhuluma kodwa akula akwenzayo. Abantu abalutshwana ababuyelayo bayathwala nzima emngceleni uma bezama ukubuyela."

Uthi abantu abanengi bamadolo nzima ngoba kukunengi okungahambi kahle ngitsho lenhlanganiso ebona ngeziphepheli, eye United Nations High Commission on Refugees, ingaphi kuhle imali.

Uthi inengi latshiselwa imizi ngesikhathi sokhetho lokudinga umongameli weZimbabwe ngomnyaka ka2008 ngakho abaselalutho uma bebuyela ekhaya.

"Kuyadingeka ukuthi uhulumende endonse amasokisi ancedise abantu. Abantu babelento zabo ezinjenge mizi, inkomo kanye lokunengi. Kwathathwa yibo abababusayo abeZANU."

UWeza uthi isifiso sokubuyela sikhona ngoba abathandi ukuhlala enkambeni bevalelwe, bengenzi lutho, kodwa kumele kuntshintshe okunengi ngaphambi kokukuthi baphindele emuva. Uthi kungabanzima ukuthi umuntu aphongusukuma esiya ekhaya engakwazi azakuthola.

Iziphepheli ziyesaba ukuthi udlakela olwazixotsha ekhaya ngomnyaka ka2008, lulakho ukuqhamuka njalo ngoba kulokufuthelana okukhulu khathesi eZimbabwe ngezombusazwe.

Owayengumphathintambo obona ngendaba zasekhaya kwele Zimbabwe, uMnu. Obert Mpofu, wathembisa ukuthi osekudlule sekudlule ngaphansi kukahulumende kaMongameli Emmerson Mnangagwa ngesikhathi ekhuthaza iziphepheli ukuthi ziphindele ekhaya.

Kodwa abanengi abawathembi amazwi kahulumende ngesikhathi kusibalukhuni ngamandla kwezomnotho lakwezombusazwe.

Udaba Esilwethulelwe nguMark Peter Nthambe
please wait

No media source currently available

0:00 0:03:09 0:00

XS
SM
MD
LG