Umanyano wenhlanganiso ezimela izisebenzi zikahulumende eye Apex Council ithi umkhankaso wangoLwesine wokukhalala umsebenzi kwezisebenzi zikahulumende elizweni jikelele okosuku olulodwa uphumelele ikakhulu kugatsha lwezemfundo.
Intatheli yethu uMavis Gama ubika ukuthi kodwa zinengi izisebenzi ezingakhalalanga umsebenzi eHarare.
Izisebenzi ezinengi zibikwa zikhalele umsebenzi ko Bulawayo, eNkabazwe kanye le Masvingo loba nje ezinye bezisebenza njengenhlalayenza.
Abongi ezibhedlela ezinjenge Mpilo le United Bulawayo Hospitals babikwa bekhalale umsebenzi. Izisebenzi ezingakhalalanga umsebenzi zithi bezisesaba ukuthi zingaxotshwa umsebenzi nguhulumende.
Umnu. Jonah Ncube ongumbalisi kwesinye isikolo koBulawayo uthe ukukhalala umsebenzi akusoze kwenze uhulumende akhuphule iholo lezisebenzi ezifuna ukuthi isisebenzi esingelasikhundla sithole amakhulu amahlanu lamatshumi amane amadolllar eMelika ngenyanga. Okwamanje izisebenzi lezi zihola amakhulu amabili lamatshumi amahlanu amadollar.
Umnu. Abbiot Moyo ofundisa eHarare uthi banengi ababalisi abasezikolo zemfundo ephansi abakhalale umsebenzi.
Umnu. Sifiso Ndlovu oku Apex Council njalo ongumqondisi we Zimbabwe Teachers Association uthi inhlanganiso le isithethe isinqumo sokuthi izisebenzi zikahulumende zikhalale umsebenzi kusukela ngoMvulo ngeviki ezayo.
Ukuze sihlaziye udaba lolu kanye lokunye okubahluphayo, intatheli yethu uSithandekile Mhlanga uxoxe loMnu. Isaac Mpofu umlobi wezingwalo njalo owayengumbalisi loMnu. George Mkhwanazi oyingcwethi kwezombusazwe.
