Izisebenzi ze Anjin Investments yakwele China emba amadayimana eMarange sezikhalale umsebenzi ngenxa yeholo eliphansi lokukhahlamezwa ngabaqhatshi.
Izisebenzi lezi zibikwa zikhalale umsebenzi ngoMqgibelo zisithi labo abangela zikhundla bathola amadollar alikhulu lamatshumi ayisitshiyangalo mbili ngenyanga.
Izisebenzi lezi zithi zifuna ukuthi abangela zikhundla bathole amakhulu ayisithupha amadollar ngenyanga.
Zithi sezehlulekile ukuvumelane labaqhatshi ngeholo elikhuphukileyo ngakho-ke azisoze zibuyele emsebenzini zize zithole iholo eliphezulu.
Izisebenzi lezi zibikwa zisithi ziyakhahlamezwa ngabaqhatshi abavela kwele China njalo kazila zembatho ezisetshenziswa ukwemba amadayimana.
IStudio 7 kayenelisanga ukukhuluma leziphathemandla ze Anjin Investments, iZimbabwe Mining Development Corporation edlelana layo kanye labamele uhulumende.
Inkampani ye Anjin isanda kuphiwa imvumo yi Kimberly Process Certification Scheme ukuthi ithengise amadayimana ayo alohlonzi olwedlula izigidi ezimbili zama carats.
Umnu. Japhet Moyo ongunobhala jikelele wenhlanganiso yezisebenzi iZimbabwe Congress of Trade Unions uthi akumangalisi okwenzakala kunkampani ye Anjin Investments.
Izisebenzi Ze Anjin Investments Ye China Ezikhonona Ngeholo Eliphansi Zikhalala Umsebenzi
- Gibbs Dube
