Izisebenzi ze Shabanie Mashaba Mines ezacina ukuhola ngomnyaka ka 2009 zize zabhadalwa iholo lika Mpalakazi loba nje zikhonona ngokuthi kulemali enengi okumele ziyithole kunkampani le.
Izisebenzi lezi ziholiswe imali etshiyeneyo ngoLwesihlanu njengoba lezo ezithola iholo eliphansi ziphiwe yi Zimbabwe Mining Development Corporation ikhulu lamatshumi ayisithupha amadollar kwathi-ke labo abalezikhundla banikwa inkulungwane ezintathu zamadollar.
Umnu. Percy Ngwenya ongumgcinisihlalo we khomithi yezisebenzi ezilezikhundla utshele iStudio 7 ukuthi loba izisebenzi zijabulele iholo leli okuzethusayo yikuthi zilakho ukungatholi imali engakabhadalwa kusukela ngo 2009.
UNgwenya uthi inkampani ye ZMDC kayizange itsho ukuthi ingabhadala nini iholo leli njalo lokuthi ingaqalisa nini umsebenzi emigodini le eyavalwa ngomnyaka ka 2010 ngenxa yokuswela imali yokwemba utshinda lwe asbestos.
Omele ikhomithi yedale lephalamende ebona ngezemigodi uMnu. Moses Mare uthi kuyajabulisa okwenziwe yi ZMDC loba nje idale leli likhankasela ukuthi kubotshwe uMnu. Erafas Gwaradzimba owanikwa imvumo nguhulumende yokuthi adinge amaqhinga okuvuselela kumbe wokuvala inkampani le.
UGwaradzimba wetheswa icala lokufaka imali engange zigidi ezimbili zamadola emkambo wemali eBhilithane kungela mvumo.
Umnu. Ngwenya uthi izisebenzi lokhe zithithibele ngokwenzakala kunkampani ye Shabanie Mashaba Mines.
Ingcwethi kwezenotho uMnu. Masimba Kuchera uthi inkampani ye ZMDC kayiqedakali ukuthi yenzani emigodini le eyathathelwa uMnu. Mutumwa Mawere nguhulumende esetheswa icala lokufihla imali yakhe emikambo yemali emazweni.
